Тарамдалған тағдыр жолы біреулерге тақтадай тегіс болса, енді біреулер үшін түрлі соқпаққа толы болады. Жазмыштың жазғанымен жарық дүниені көре алмаған жандар да тағдырдың тезіне жасымаған. Жыл сайын 13 қараша халықаралық зағиптар күні аталып өтіледі. Осыған орай аудандық орталықтандырылған кітапханада «Сену, өмір сүру, жеңу» ұранымен дойбыдан жарыс өтті.
Аталған шара «Жанарсызда жарық әлем» клубының мұрындық болуымен ұйымдастырылды. Сайысқа 12 дойбышы қатысып, бақ сынады. Турнирді аудандық спорт клубының мүмкіндігі шектеулі азаматтардың жетекшісі Ерлан Зермұхамед жүргізді.

– Біздің мақсат – ерекше қажеттілігі бар жандарды спортқа баулып, өмірге деген құлшынысын арттыру. Яғни қанаттандыру, жігерлендіру, шабыттандыру, – деді.

Байқаудың нәтижесінде ерлер арасында бас жүлдені Н.Әлімбетов жеңіп алса, 1-орынды Қ.Сүлейменов, 2-орынды Б.Әширов, 3-орынды А.Әширов иеленді. Әйелдер арасында 1-орын Қ.Әбсаттарова, 2-орын Қ.Төлеева, 3-орын Б.Переноваға бұйырды.

Бұл күн мереке деп аталғанмен, тәубеге келушілердің қатарын арттырады. Себебі сіз арайлап атқан таң мен қызарып батқан кешті, жақын жанның бейнесін көре алғанымыз үшін бақыттымыз.Басқаға арман болған қолдағы бақытыңыздың бағасын біліп, қадірін ұғынғаныңыз жөн, құрметті оқырман!