Аудан көлемінде жыл бойына мүмкіндігі шектеулі жандарға арналған шаралар легі жалғасын табуда. Соның бірі – «Мүмкіндігі шектеулі азаматтармен жұмыс жасау әлеуметтік қызмет жүйесін ұйымдастыру» әлеуметтік жобасы аясында «QAZAQSTAN ZASTARY» қоғамдық қорының ұйымдастыруымен өткен шара. Нақтырақ айтсақ, «Спорт денсаулық кепілі» тақырыбында мүмкіндігі шектеулі жастар арасында дойбыдан жарыс өтті.
Жарысты аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Ағыбай Төлегенов ашты. Ол аудан көлемінде мүмкіндігі шектеулі жандардың қоғам өміріне белсенді атсалысуына жан-жақты жұмыстар жүргізіліп жатқандығын жеткізді. Сондай-ақ олардың ой-өрісін дамытуға тоғызқұмалақ, дойбы жарыс­тыра жиі-жиі өткізілетінін де тілге тиек етіп, спортшыларға сәттілік тіледі. Көкшоқы мөлтек ауданының спорт кешенінде ұйымдастырылған сайысқа аудан көлеміндегі мүмкіндігі шектеулі жастар қатысты. Мұндағы мақсат – олардың спорт арқылы потенциалын көтеріп, өзін-өзі таныту, қоғамдағы белсенділігін арттыру.

Дойбыдан жарысқа түскен жастардың өмірге, спортқа деген өзгеше қызығушылықтары көрініп-ақ тұрды. Жарыс қорытындысы бойынша І орынды Ержан Әбілтаев жеңіп алса, ІІ орынды ­Азамат Хафизов қанжығасына байлады. Ал, ІІІ орын Нұржігіт Абжапбаровқа берліп, арнайы дипломдар және заттай сыйлықтар табысталды.