Жас спортшының жарқын жеңісі

Спорт – табандылық пен жігерді, тәртіп пен төзімділікті талап ететін үлкен мектеп. Жас ұрпақтың бойындағы осындай қасиеттерді шыңдап, биік белестерге жетелейтін спорттық додалар оқушылардың қабілетін танытып қана қоймай, ел намысын қорғауға деген жауапкершілігін арттырады.
Осы орайда Алмалы ауылының №181 қазақ орта мектебінің 10-сынып оқушысы Думан Изатулланың жетістігі – аудан үшін зор мақтаныш.

Жас спортшы Қызылорда облысының құрама командасы сапында өнер көрсетіп, Қазақстан Республикасы Ауыл жасөспірімдерінің V жазғы ойындарында жүлделі ІІ орынға ие болып, күміс медальді қанжығасына байлады. Бұл – Думанның спортқа деген қызығушылығы мен тынымсыз еңбегінің, табандылығы мен жігерінің жемісі.

Облыс намысын қорғаған жас спортшы жарыс барысында өзінің шеберлігі мен қайсарлығын танытып, команда құрамында жоғары нәтиже көрсетуге өз үлесін қосты. Жас спортшының бұл жетістігі – қатарластарына да үлгі. Өйткені жеңіс жолы еңбекпен, төзіммен және өзіне деген сеніммен келетінін Думан өзінің нәтижесімен дәлелдеп отыр.

Мектеп абыройын асқақтатып, облыс құрамасы сапында лайықты өнер көрсеткен Думан Изатулланы күміс жүлдесімен шын жүректен құттықтаймыз! Алдағы жарыстарда биік белестерді бағындырып, жеңіс тұғырынан көріне беруіне тілектеспіз.