Құрыш қолды құрылысшылар

Әрбір бой көтерген тұрғын үй, әлеуметтік нысан, жол, инженерлік желі – халықтың әл-ауқатын арттыруға бағытталған жасампаз еңбектің жемісі. Сондықтан құрылысшы мамандығы қай уақытта да құрмет пен алғысқа лайық.
Жыл сайын тамыз айының екінші жексенбісінде елімізде құрылысшылар күні аталып өтеді. Бұл – туған жердің келбетін көркейтіп, елдің ертеңіне қызмет ететін ғимараттар мен нысандарды тұрғызуда маңдай терін төгіп жүрген құрылысшылардың кәсіби мерекесі. Олар күннің аптап ыстығына да, қыстың қақаған аязына да қарамастан, өз еңбегімен ел игілігіне қызмет етіп келеді. Сол себептен аталған мереке – тек бір саланың ғана емес, жасампаз еңбекке көрсетілген құрметтің белгісі.

Бүгінде құрылыс саласы – мемлекеттің әлеуметтік-экономикалық дамуының басты көрсеткіштерінің бірі. Тұрғын үй құрылысының артуы, инженерлік инфрақұрылымдардың жаңаруы, әлеуметтік нысандардың бой көтеруі – халықтың өмір сүру сапасының жақсарып, өңірдің өркендеп келе жатқанын аңғартады. Осы тұрғыдан алғанда Шиелі ауданында құрылыс саласында жүйелі жұмыстар атқарылып, ауқымды жобалар кезең-кезеңімен жүзеге асырылуда.

Ауданның сәулеттік келбетін қалыптастыру, құрылыс жұмыстарын үйлестіру, қала құрылысы талаптарының сақталуын қамтамасыз ету бағытында «Шиелі ауданының құрылыс, сәулет және қала құрылысы бөлімі» коммуналдық мемлекеттік мекемесі нәтижелі еңбек етіп келеді. Мекеме қызметкерлері әрбір жобаның сапалы жүзеге асуына жауапкершілікпен қарап, ауданның тұрақты дамуына өзіндік үлесін қосуда.

Бөлімде бүгінгі таңда штат бойынша 18,5 бірлік қарастырылған. Оның ішінде 5 мемлекеттік қызметкер, 6 әдіскер, 1 хатшы, 1 автокөлік жүргізушісі, 3 қарауыл және 2 еден жуушы еңбек етеді. Бір қарағанда көзге көріне бермейтін бұл ұжымның күнделікті еңбегі ауданның сәулетті келбетін қалыптастыруға, тұрғындардың жайлы өмір сүруіне бағытталған маңызды жұмыстардың табысты орындалуына негіз болып отыр.

2026 жылдың жеті айының қорытындысы бойынша аудан көлемінде бірнеше ірі жоба іске асырылуда. Солардың бірі – Береке мөлтек ауданын табиғи газбен қамтамасыз ету құрылысы. Аталған жобаға 56,8 миллион теңге қаржы бөлініп, бас мердігер «СК Орда-Құрылыс» ЖШС тарапынан құрылыс-монтаж жұмыстары басталды. Жоспарға сәйкес, биыл Береке мөлтек ауданының тұрғындары табиғи газға қосылып, көгілдір отынның игілігін көреді. Жоба тұрғындардың тұрмыс сапасын арттырып қана қоймай, өңірдің инженерлік инфрақұрылымын дамытуға да үлкен серпін береді.

Қазіргі таңда Шұғыла мөлтек ауданында салынған және алдағы уақытта пайдалануға берілетін арендалық тұрғын үйлерді инженерлік инфрақұрылыммен қамтамасыз ету бағытында кешенді жұмыстар жүргізілуде. Атап айтқанда, ауызсу жүйесінің құрылысына 210 миллион теңге, электр желілеріне 211,8 миллион теңге, жол инфрақұрылымына 312 миллион теңге көлемінде қаржы бөлініп, мердігер мекемелер құрылыс жұмыстарын қарқынды жүргізуде.

Ауданның әлеуметтік инфрақұрылымын дамыту бағытындағы маңызды жобалардың бірі – Жөлек ауылындағы спорт кешенінің құрылысы. Балалар мен жастардың спортпен тұрақты айналысуына жағдай жасау мақсатында қолға алынған жобаның жалпы құны 613,9 миллион теңгені құрайды. Бас мердігер – «Интегрострой» ЖШС. Заманауи талаптарға сай бой көтеретін бұл нысан ауыл жастарының спортпен шұғылданып, салауатты өмір салтын қалыптастыруына мүмкіндік береді.

Сонымен қатар Шиелі кентіндегі Абай көшесі №28 мекенжайында орналасқан спорт кешеніне күрделі жөндеу жұмыстары жүргізілуде. Жобаның бас мердігері – «СК ЛИРА» ЖШС. Келісімшарт құны 249,891 миллион теңгені құрайтын жоба аясында спорт кешені толық жаңғыртылып, тұрғындардың игілігіне заманауи талаптарға сай қайта ұсынылатын болады.

Тұрғын үй құрылысы – халықтың әл-ауқатын арттырудағы маңызды бағыттардың бірі. Осы мақсатта Шиелі кентінің Шұғыла және Бәйтерек шағын аудандарында жалпы 200 пәтерлі 100 тұрғын үйдің құрылысы басталды. Бұл бастама тұрғын үй кезегінде тұрған көптеген азаматтардың баспаналы болуына мүмкіндік жасап, әлеуметтік мәселелердің шешілуіне оң ықпал етеді.

Осы жұмыстардың жүзеге асырылуы жөнінде осы бөлімнің басшысының міндетін атқарушы Нұршат Бағдатұлы өз пікірін білдірді.

– Құрылыс – ел дамуының маңызды бағыттарының бірі. Әрбір салынып жатқан нысанның артында халықтың игілігі мен болашаққа деген сенім жатыр. Біздің негізгі міндетіміз – құрылыс жұмыстарын сапалы ұйымдастырып, жобалардың белгіленген талаптарға сай орындалуын қамтамасыз ету.

Бүгінде ауданымызда газдандыру, инженерлік инфрақұрылымды дамыту, тұрғын үй және әлеуметтік нысандар салу бағытында ауқымды жұмыстар жүргізілуде. Бұл жұмыстар тұрғындардың өмір сүру сапасын арттыруға, ауданның көркеюіне және болашақ дамуына негіз болады. Осы бағыттағы жұмыстар алдағы уақытта да жалғасын табады, – дейді ол.

Шындығында, құрылыс – бүгіннің ғана емес, келешектің де қамы. Бүгін бой көтерген әрбір тұрғын үй ертең бір әулеттің шаңырағына айналады. Салынған спорт кешендері – ­чемпиондарды тәрбиелейтін орта болса, тартылған газ бен инженерлік желілер – тұрғындардың өмір сүру сапасын жақсартатын маңызды игілік. Сондықтан құрылыс саласына салынған әрбір инвестиция – халықтың әл-ауқатына салынған инвестиция.

Шиелі ауданында жүзеге асырылып жатқан жобалар өңірдің әлеуметтік-экономикалық әлеуетін арттырып, ауданның сәулеттік келбетін жаңғыртуға қызмет етуде. Бұл жұмыстардың барлығы мемлекет қамқорлығының, аудан басшылығының жүйелі саясатының және құрылыс саласы мамандарының кәсіби еңбегінің нәтижесі.

Құрылысшылар – ел дамуының үнсіз шежіресін қалыптастырып жүрген еңбек адамдары. Олардың қолымен бой көтерген әрбір нысан – уақыттың таңбасын қалдырып, халық игілігіне қызмет ететін құндылыққа айналады. Әрбір қабырғада – маңдай тер, әрбір құрылыс алаңында – үлкен жауапкершілік пен кәсіби ізденіс жатыр.

Өңірде жүзеге асырылып жатқан ауқымды жобалар – құрылыс саласы мамандарының табанды еңбегінің нәтижесі. Бой көтерген жаңа нысандар мен жаңарған инфрақұрылым ауданның келешек келбетін айқындап, тұрғындардың өмір сапасын арттыруға бағытталған маңызды қадам болып отыр.

Құрылыс – бүгінгі күннің ғана емес, келер ұрпақтың игілігіне қызмет ететін сала. Осы жолда еңбек етіп жүрген құрыш қолды құрылысшылардың әрбір ісі – ел дамуына қосылған елеулі үлес, ал олардың маңдай терімен қаланған әрбір нысан – уақыт сынынан өтетін жасампаз еңбектің белгісі.