ҚАЗАҚТЫҢ ТАМЫРЫ – АУЫЛДА, БОЛАШАҒЫ – ДАМУДА
Қай кезде де ауыл – елдің арқауы, тіршіліктің тұтқасы болып келген. Қазақ үшін ауыл – кіндік қаны тамған жер ғана емес, ұлттың тіні, тамыры терең тарихтың аманаты. Сондықтан ауылды дамыту – тек экономикалық саясат емес, ол – ұлттық тағдырды айқындайтын стратегиялық бағыт.Бейсенбі күні Шиеліде өткен кездесу осыны айқын көрсетті. ҚР Ұлттық экономика вице-министрі Бауыржан Омарбеков аудан халқымен жүздесіп, ауылдағы өзекті мәселелерді талқылады. Жиынға облыс әкімінің орынбасары Данияр Жаналинов төрағалық етіп, еркін сұхбат алаңы қалыптасты. Мұнда айтылған ойлар мен ұсыныстар – ауылдық жердің ертеңгі даму картасының бір бөлшегі іспетті.
Еркін форматтағы кездесуде көтерілген мәселелер ауылдың қазіргі жағдайын ғана емес, болашағын да айқындайды. Ауылды дамыту, инфрақұрылымды жаңғырту, тұрғын үй құрылысы, әлеуметтік нысандардың жағдайы, жолдар мен инженерлік желілердің сапасы жайлы көкейдегі сауалдарын қойды. Әрбір мәселе назардан тыс қалмай, тиісті жауап берілді. Мұндай ашық алаңдар – жергілікті халықтың үнін естіп, нақты шешімдер қабылдаудың маңызды қадамы. Жиында айтылған ұсыныстар алдағы уақытта ауданның даму жоспарына енгізіліп, жаңа жобалардың бастау алуына негіз болады деген сенім бар. Бұл – мемлекеттік саясаттың басты бағыты – «Халық үніне құлақ асатын мемлекет» қағидатының нақты көрінісі.
Кездесуден кейін вице-министр Шиелі ауданында жүзеге асырылып жатқан бірқатар маңызды нысандардың жұмысымен танысты.
«Ауыл – Ел бесігі» жобасы аясында күрделі жөндеуден өткен Көкшоқы спорт кешені бүгінде жасөспірімдер мен балалардың сүйікті орталығына айналып отыр. Құны 315 млн теңге болатын жоба жастардың бос уақытын тиімді өткізуіне, спортпен шұғылданып, салауатты өмір салтын қалыптастыруына мүмкіндік беруде. Бұл – ауылдық жерде әлеуметтік инфрақұрылымның жаңа деңгейге көтерілгенінің айқын мысалы.
Ал «Ауыл аманаты» жобасы кәсіпкерлікті қолдауға тың серпін беруде. Шиелі кентінің орталығындағы бизнес-инкубаторда бүгінде 5 кәсіпкер жеңілдетілген несие мен мемлекеттік қолдаудың арқасында өз өндірісін бастап, жұмыс жүргізіп отыр. Жалпы сомасы – 70,1 млн теңге. Бұл – аудан тұрғындарының кәсіпкерлікке деген ынтасын арттырып, жаңа жұмыс орындарының ашылуына жол ашқан нақты қадам.
Соңғы үш жыл ішінде «Ауыл аманаты» жобасы аясында ауданда жалпы құны 968,1 млн теңгені құрайтын 135 жоба қаржыландырылды. Нәтижесінде жаңа жұмыс орындары ашылып, ауылдық кәсіпкерлік жаңа деңгейге көтерілді. Бұл – статистикадан да жоғары ұғым. Анығында жүздеген отбасының табысы, жүздеген жастың еңбекке араласуы, мыңдаған жанның болашаққа деген сенімі.
Мемлекет басшысы Қасым-Жомарт Тоқаев әрдайым ауылдың дамуын стратегиялық басымдық ретінде атап келеді. Өйткені ауылдағы әрбір игі іс – елдің болашағына салынған инвестиция. Ауыл – елдің жүрегі. Ал жүрек соғып тұрса, тіршілік бар. «Ауыл – Ел бесігі» мен «Ауыл аманаты» жобалары елді мекендегі өмірді жаңғыртып, ұлттық дамудың жаңа дәуірін бастап берді. Сол үшін бүгін қолға алған әрбір бастама – ертеңгі ұрпаққа қалатын мұра. Өйткені ауылдың өркендеуі – мемлекеттің қуаты, халықтың бақуаты.
С.БАХТИЯРҚЫЗЫ
