Бәріңізге белгілі,1 сәуір – күлкі күні. Бұл мерекеде жақсы жандар бір-біріне күлкі сыйлауға асық.Әзілің жарасса, атаңмен ойна» деген қазақ нақылына сәйкес, орынды қалжың-оспақ мереке сәнін кіргізеді. Осы керемет күнге орай сейсенбі күні Б.Қабылұлы атындағы аудандық мәдениет үйінде «Күлкідуман» атты мерекелік кеш өтті. Көрермендердің назарына аудан өнерпаздарының көңілді әндері ұсынылды. Сондай-ақ ауданға Кейден ауылдық клубының директоры Балмұхаммед Әбжаппаров арнайы келіп, өз өнерін көрсетіп, тұрғындарға тамаша көңіл-күй сыйлады. Ол түріктің атақты сатирик жазушысы Әзиз Несиннің «Әйтеннің байы» атты туындысын орындап, көпшіліктің құрмет қошеметіне бөленді.

Мұнан соң сахнаға Алғабас ауылдық мәдениет үйі жанындағы «Қытық» халықтық әзіл-сықақ отауының әртістері шықты. Талантты балалар Кенжебай Жүсіптің «Картоп» атты интермедиясын қойды. Сонымен қатар «Қытық» әзіл-сықақ отауының көркемсөз үйірмесінің оқушысы Жібек Ерікболқызы да әртістік шеберлігімен аудан жұртшылығын бір серпілтті. Расында,күлкі – көңіл-күйдің ерекше тебіренісі. Дәрігердің айтуынша, күлкі – адамның терісін жетілдіретін көрінеді. Келбетімізді сәнді, жүрегімізді мәнді қылып, шынайы күліп, өзгеге шаттық сыйлаудан жалықпайық. «Күлкі – өмір, күлдіре білу – өнер, күлкі болу – өлім» демекші, ортамыз әрдайым қуанышқа тола берсін.

Айнұр МАХСҰТҚЫЗЫ