Өскен өңір Osken-onir.kz ақпараттық агенттігі
» » КЕҢЕСТЕ КЕЛІСІЛГЕН ІС КЕЛТЕ БОЛМАЙДЫ

КЕҢЕСТЕ КЕЛІСІЛГЕН ІС КЕЛТЕ БОЛМАЙДЫ

Жақында аудандық партия филиалының мәжіліс залында Шиелі аудандық ҚХА жанындағы Аналар кеңесінің алғашқы отырысы өтті. Жиынды Аналар кеңесінің төрайымы Патима Шаймерденқызы ашып, жүргізіп отырды. Ол 2024 жылы атқарылатын облыстық және аудандық жоспарды таныстырып, оның ерекшелігіне, кеңестің алға қойған міндеттеріне айрықша тоқталды.
Алқалы басқосуға кеңес төрайымы Патима Маханбет және кеңес мүшелері, аудан бойынша білім бөлімі басшысының міндетін атқарушы Марат Ақпанбетов және аудандық қоғамдық даму бөлімінің әдіскері Жанар Махамбетова, «Қоғамдық келісім» КММ Шиелі аудандық сарапшы Біржан Өтебаев пен БАҚ өкілдері қатысты.
Келелі кездесуде маңызды деген мәселелер қаралды. Атап айтсақ, мектеп оқушылары арасындағы өз-өзіне қол жұмсау фактілері және оның көріністерінің алдын алу шаралары жайлы кеңінен талқыланды. Бұл жөнінде аудандық білім бөлімі басшысының міндетін атқарушы М.Асанханұлы хабарлама жасады. Бүгінгі таңда күн тәртібінен түспей тұрған мәселенің бірі де – осы балалардың тәртібі мен тәрбиесі. Ал кеңес мүшелері хабарламашыға жастардың бойына патриоттық сезім сіңіру турасында түрлі ұсыныстарын айтты.
Шараны Аналар кеңесінің төрайымы қорытындылады. Алдағы уақытта кеңес мүшелерін жаңарту жұмыстары жүргізілетіндігін, барлық айтылған ұсыныстар хаттамаға енгізіліп, тиісті мемлекеттік мекемеге жолданатындығын түсіндірді. Сондай-ақ әрбір кеңес мүшесі белсенді түрде жұмыс істеу керек екенін және ауылдық деңгейдегі Аналар кеңесінің төрайымдары қайтадан сайланатындығын да айтты.

Айнұр ИБРАШЕВА
08 сәуір 2024 ж. 76 0