Облыстық білім басқармасының басшысы Есжанов Асқарбек Темірбекұлы мен Қазақстандық салалық білім және ғылым қызметкерлері кәсіптік одағының Қызылорда облыстық ұйымының төрайымы Есқалиева Гүлнәр Бабабекқызы сала қызметкерлері үшін еңбек жағдайлары, жұмыспен қамту және әлеуметтік кепілдіктер жөніндегі әлеуметтік әріптестік туралы 2024-2026 жылдарға арналған келісімге қол қойды.

Әлеуметтік әріптестік туралы 2024-2026 жылдарға арналған келісімге қол қою сала қызметкерлерінің сапалық деңгейі арттыру мен еңбек заңдылықтарына сәйкес жұмыс жасауы үшін маңызды оқиғалардың бірі болып табылады. Мұнымен бірге өзара теңдік, келісімге келу қағидаттарына негізделген мемлекеттік билік органдары, жұмыс берушілер, кәсіподақтар арасындағы қатынастарды реттеудің тиімді тетігі.

Қол қойылған құжаттың сала қызметкерлері үшін маңыздылығына тоқталған басқарма басшысы Асқарбек Темірбекұлы: “Бұл мемлекет басшысының әлеуметтік әріптестікті дамыту туралы тапсырмасын орындау барысындағы нақты қадам. Мұндай өзара әріптестік сала қызметкерлерінің мүддесі үшін бірлескен міндеттерді шешу үшін берік негіз болатынына сенімдімін”-деді.

Салалық келісім тараптардың қызметкерлерге қажетті еңбек және әлеуметтік-экономикалық жағдайлар жасау және білім беру ұйымының тұрақты және тиімді қызметін қамтамасыз ету жөніндегі келісілген ұстанымдарын келісім-шарттық тәртіппен айқындау мақсатында Қазақстан Республикасының заңнамасына сәйкес жасалды.