Ақсақалын тыңдаған ел адаспайды. Осы бір даналықты білмейтін жан кемде-кем. Сондықтан да, бүгінгі мәселені аудан әкімінің назарына емес, ардагерлерге қарата айтқанды жөн көрдік. Мүмкін, ардагерлер араласқан іс аяқсыз қалмас деген үміт. Себебі, қазақ халқында бағзыдан дау-дамай, түйіткілді мәселе қариялардың алдынан өтіп, оң шешімін тапқанын тарихтан білеміз. Ал, біздің айтпағымыз осыдан 2 ай бұрын, яғни, тамыз айының 17-сінде, газеттің №65 санында жарыққа шыққан «Көрген көзде жазық жоқ» атты мақала еді.
Орталық стадион алаңы. Яссауи көшесі беткейінде Иманжүсіп Құтпанұлының тас­тан қашалған тау мүсіні орналасқан. Әнші-композитор, азаттық жолындағы күрескер Иманжүсіп Құтпанұлы – қазақ тарихында орны зор тұлға. Шиелінің шырайын кіргізген батыр бейнесіне сөз жоқ. Алыстан көз тартады. Болмыс бітімін айтсаңызшы...

Бірақ, жанында жол бетіне шығып жатқан кәріз суының жағымсыз иісінен ескерткіштің қасына жақын барғың келмейді. Бір қапталында ардагерлер үйі орналасса, екінші қапталында қонақ үй бар. Міне, сол қонақ үйдің құбырынан аққан су жолдың бетіне шығып, жаяу жүргіншілерді әбігерге салуда. Аудан тұрғындарының сөзіне құлақ түрсек, балалардың, оқушылардың жүріп-тұруына зиянын тигізуде. Әрі асфальтталған А.Ясауи жолының да сиқын қашырды дейді.

Күз келіп, қамбаны астыққа толтырған диқандар «Сабан тойға» дайындалып жатқаны тағы бар. Әрі биыл даңғайыр диқан Ы.Жақаевтың 130 жылдық мерейтойы. Осынау айтулы мереке қарсаңында жыл сайын Орталық стадион алаңында «Алтын күз» мерекесі аталып өтеді. Биыл да бұл үрдістен жаңылмайтынымыз аян. Алайда, Шиеліге келген қонақтардың көзі А.Ясауи жолының бойындағы олқылыққа түссе, атымызға сын болмайды ма? Үнемі жұмыс орнына қоңырау шалсақ, кент ішін аралауға кететін кент әкімдігі мен аудан әкімдігінің жауапты сала мамандарының көзіне бұл мәселе неге көрінбей жүр? Аудандық «Өскен өңір» газетінің фото тілшісі Бақытжан Бәйімбеттің кадрна ілінген бұл олқылықты тиісті мамандар назарға алуын сұраймыз.