Еңбектің киелі құдіретін дәлелдеген ардагерлерді ұлықтау, ғұмыр жолын өскелең ұрпаққа үлгі-өнеге ету – бүгінгінің парызы. Соның бір көрінісі – аймақтың әлеуметтік-экономикалық, мәдени- рухани дамуына ерекше үлес қосқан азаматтарды ардақтап, құрмет көрсету шараларын өткізу Шиелі ­ауданы үшін дәстүрге айналды.

Жуырда аудан әкімінің қолдауымен, «Қазалы-Жомарт» бірлестігінің ұйымдастыруымен «Руханият» орталығында «Қарттарым – асыл қазынам» тақырыбымен ардагерлер арасында шахмат-дойбыдан жарыс өтті. Сайыстың бас­ты мақсаты – қарттардың ой-санасының сергектігін, даналығын дәріптеп, оларға құрмет көрсету. Шараның ашылуында аудандық мәслихат төрағасы Мұрат Өскенбайұлы ардагерлерді 30 тамыз Қазақстан Республикасының Конституция күнімен құттықтап, жарысқа сәттілік тіледі.

Қазақ елінің еңсесін биіктетіп, елдігін айғақтап, егемендігін баянды еткен қасиетті Ата Заңға 30 жыл толуына орай өткізілген сайысқа түрлі салада абыройлы қызмет етіп, мәртебелі зейнетке шыққан 10-нан аса ардагер қатысып, өзара шеберліктерін ортаға салды. Сондай-ақ, Тәжік-Ауған шекарасындағы ұрыс қимылдарының ардагерлері, Семей ядролық сынақ полигонының ардагерлері, Ауғанстан соғысының ардагерлері, Таулы Қарабах ардагерлері, Желтоқсан оқиғасына қатысушылар, Чернобыль апатының зардаптарын жоюға атсалысқан ардагерлер қатысты.

Екі сағатқа созылған тартысты бәсекеде ардагерлер шеберлік танытып, тартысты ойын өрнегін көрсетті. Жүзден жүйрік, мыңнан тұлпар шыққан және ойынға белсенділік танытқан ардагерлерге арнайы Алғыс хат пен медальдар және бағалы сыйлықтар табыс етілді.

Осылайша әзіл-қалжың аралас өткен тартысқа толы қызықты ойында ардагерлердің көңілкүйі көтеріліп, марқайып қалды. Өз кезегінде ардагерлер де ұйымдастырушы тарапқа алғыс айтып, дәстүрге айналған жарыстың сәтті өтуіне ризашылық білдірді.