Таудай талабы мен еңбегінің арқасында көркейген жандар арамызда аз емес. «Бақытын еңбектен тапқан жан» деп жатады халық даналығы мұндайда. Еңбекті жанына етене тұтып, еңбекпен есейген сондай жандардың бірі Ерлан Сұлтанов Ақмая ауылдық округіне қарасты «Ақмая» шаруа қожалығында тынымсыз еңбек етіп келеді.
Еңбек мектебінен алған тәлім адамға өмірлік азық болатынын ауданымыздан шыққан 41 «Еңбек Ері», егіс алқабында бар өмірін өткізген Ы.Жақаев, Ш.Қазанбаева сынды тұлғалар дәлелдеп келеді. Сол еңбек адамдарының ізін жалғап, жас Жақаевшылар қатарынан көрініп жүрген кейіпкеріміз Ерлан Тұрсынұлы 1985 жылы 8 ақпанда Шиелі ауданы, Ақмая ауылында дүние есігін ашады. Сырдың ақ маржанын жайқалтып, рекордтық өнім жинаған даңқты диқандар яғни, 16 Социалистік Еңбек Ері шыққан Ақмая ауылында туып өскен еңбекқор бала бүгінгі күні шаруа қожалықтың бригадирі атануы заңдылық.
Ол, 2002 жылы Қызылорда экономика және құқық колледжінде «Кеден ісі» мамандығы бойынша білім алады. Оқуды аяқтаған соң Отан алдындағы борышын өтеп, елге абыройлы оралады. Ерге тән болмысы қара күштің иесі екені батырға бергісіз тұлғасынан-ақ аңғаруға болады. Еңбек жолын 2007 жылы «Ақмая» шаруа қожалығында №1 өндіріс бригадасында есепші болып бастаған Ерлан Сұлтанов 2013 жылдан бері №3 өндіріс бригадасында бригадир қызметін адал атқарып келеді. Өзінің қажырлы адал еңбегінің арқасында еңбек ұжымында сыйлы. Тиісті жұмысты тиянақты орындай білетін жұмысшыға барлық әріптестері де қолдау көрсетіп, зор сенім артады. Оның адал да елеулі қызметіне серіктестік басшылығы да дән риза.
Егіс алқабындағы дәннің себілуінен бастап, соңғы жетілуі мен оны ору жұмыстарының қаншалықты маңдай терді қажет ететіні белгілі. Жұмысты бар ниетімен атқарған жанға еңбектің қиындығы байқалмай, тек еңбекке деген құлшыныс қана болады. Сол ынта жігердің арқасында 274 гектар күріш алқабының әр гектарынан 45 центнерден өнім алып, 1233 тонна сыр маржанын шашпай-төкпей қамбаға құйғаны үшін 2013 жылы аудан әкімінің «Сыр маржаны» атты дипломымен марапатталса, үстіміздегі жылы да алғыс хатты иеленген болатын. Маңдай термен өрілген әрбір еңбектің жемісін желдің өтінде қалдырмай, күзгі жаңбырға ұрындырмай, қыркүйектің қырына түспей, Сыр салысын ысырапсыз жиып-теріп, көктемгі егінге жерді жыртып қайта даярлау сынды қара күшті талап ететін нағыз еңбек осы диқандар қауымында десек жаңылыспаймыз.
Еңбек адамы дегенде көзге алпысқа таяған, өмірін атыз жағалаумен өткізген ардагерлерді елестете жөнелеміз. Алайда, еңбекке етене араласып, жас та болса бас болуға тырысып жүрген жас Жақаевшыларды ескерусіз қалдыруға да болмайды. Сондықтан, әр ауылдық округтің басшыларына құлаққағыс етіп, тынымсыз еңбегімен көзге көрініп жүрген жастар жайында мәлімет беріп отырса деген ұсынысымызды білдіргенді жөн көріп отырмыз. Сонда Ерлан Тұрсынұлы сияқты еңбекті шын жанымен сүйетін жас буын өкілдерін өскелең ұрпаққа үлгі ете отырып, еңбек мектебінің күш-құдіретін көрсетер едік.

Г.ӘБДІХАНИҚЫЗЫ.