АБАЙДЫ ОҚЫ, ТАҢЫРҚА

«Адамзаттың бәрін сүй, бауырым деп» деген Абайдың сөзі арада бір ғасырдан астам уақыт өтсе де, өз мәнін жоғалтқан жоқ. Керісінше, заман өзгеріп, қоғам жаңарып, адамзат жаңа технологиялық дәуірге қадам басқан сайын ұлы ақынның әр сөзіне қайта үңілудің қажеттілігі артып келеді. Өйткені Абай шығармашылығы – белгілі бір дәуірдің ғана еншісіндегі әдеби мұра емес, адам табиғатын, қоғам болмысын, білім мен надандықты, еңбек пен жалқаулықты, ар мен ұятты, махаббат пен адамгершілікті терең зерделеген мәңгілік рухани мектеп.
10 тамыз – қазақ халқының ұлы ақыны, ойшыл, ағартушы Абай Құнанбайұлының туған күні. Осы күн – ұлт әдебиетінің алып тұлғасын еске алатын ғана дата емес, Абай арқылы өзімізге есеп беретін, ұлттық руханиятымыздың бүгінгі жай-күйіне көз жүгіртетін тағылымды күн. Айтулы датаға орай Б.Қабылұлы атындағы мәдени-шығармашылық орталығының ұйымдастыруымен «Руханият» орталығында «Абайды оқы, таңырқа» атты тағылымды мәдени іс-шара өтті.

Мақсаты – халқымыздың рухани мұрасын дәріптеу, Абай шығармашылығын кеңінен насихаттау, жас ұрпақты ұлы ақынның тағылымды ойларымен сусындату. Алайда оның мәні бұдан әлдеқайда тереңде еді. Себебі Абайды дәріптеу – өткенді ұлықтау ғана емес, бүгінгі ұрпақтың ертеңіне жол сілтеу.

Абай өмір сүрген XIX ғасырдың екінші жартысы қазақ даласы үшін аса күрделі кезең болатын. Дәстүрлі қоғамның құрылымы өзгеріп, елдің саяси-әлеуметтік жағдайы күрделене түсті. Патшалық отарлау саясаты күшейіп, ел басқару жүйесіне өзгерістер енді. Ру арасындағы тартыс, мансап үшін талас, білімсіздік пен әлеуметтік теңсіздік секілді мәселелер халықтың рухани дамуына да салқынын тигізді. Осындай алмағайып заманда дүниеге келген Абай өзінің айналасындағы құбылыстарды жай ғана бақылап қойған жоқ. Ол қоғамның дертіне үңілді, оның себептерін іздеді, адамды түзету арқылы елді түзетудің жолын көрсетті. Абайдың ұлылығы да осында. Ол қазаққа ең алдымен «адам бол» деген ой тастады. Ақынның қара сөздері мен өлеңдеріне үңілсек, оның бүкіл шығармашылық мұрасынан білімге ұмтылу, еңбек ету, ғылым үйрену, мінезді түзеу, арды сақтау, адамды сүю идеялары айқын көрінеді. Абай үшін елдің болашағы – оның білімді, саналы, еңбекқор ұрпағында еді.

Сондықтан оның: «Ғылым таппай мақтанба, Орын таппай баптанба» деген өсиеті бүгінгі күні де өзекті. Бүгінгі жас ұрпақтың қолында бұрын-соңды болмаған мүмкіндік бар. Ақпаратқа жол ашық, білім алудың шекарасы кеңейді. Бірақ мүмкіндік көбейген сайын таңдау да артты. Ал таңдау көбейген жерде адамға бағыт керек. Абайдың мұрасы – осындай кезеңде жол көрсететін рухани бағдар.

«Руханият» орталығында өткен шарада осы рухани сабақтастық айқын сезілді. Мәдени шараны аудандық мәдениет және тілдерді дамыту бөлімінің бас маманы Жантас Қасымов ашып, Абай шығармаларының маңыздылығына тоқталды. Ұлы ақын мұрасының ұрпаққа қалдырылған мәңгілік қазына екеніне назар аударды. Шара барысында кітапхана оқушылары Абайдың сырлы да мәнді шығармаларын нақышына келтіре орындап, көрерменге ұлы ақынның поэзия әлемінен сыр шертті.

Жас оқырмандардың жүрекжарды жырлары бір қарағанда, қарапайым көрінгенімен, мағынасы терең көрініс. Себебі бала жүрегіне Абай сөзін сіңіру – ұлттың ертеңіне рухани дән себумен тең. Аудан өнерпаздарының әсем әндері мен өнерлері де кештің мазмұнын байыта түсті. Әуезді ән мен әсерлі жыр тоғысқан рухани кеш көрермендерге ерекше көңіл-күй сыйлады.

Тағылымды шара аясында аудандық тарихи-өлкетану музейі де ұлы ақынның мол мұрасын насихаттауға арналған көрме ұйымдастырды. Көрмеге Абайдың өмірі мен шығармашылығына арналған кітаптар, әдеби еңбектер және музей қорындағы құнды материалдар қойылып, көпшілік назарына ұсынылды.