Қоғамның рухани тынысын айқындайтын екі үлкен құндылық бар десек, оның бірі – білім, екіншісі – баспасөз. Бірі – ұрпақтың санасын тәрбиелесе, екіншісі – сол сананың көкжиегін кеңейтеді. Ал осы екі саланың арасын жалғап, білім мен ақпараттың өрісін қатар дамытуға үлес қосып жүрген жандар бар. Солардың бірі – Ақмарал Сұлтанбекқызы.
Ақмарал Иманбаева 1986 жылдың 15 қаңтарында Қызылорда облысы, Жалағаш ауданында дүниеге келген. Бала кезінен білімге құштар, ізденімпаз болып өскен ол өз болашағын ұстаздық жолмен байланыстыруды мақсат етті. Осы арманның жетегімен 2003 жылы Қорқыт ата атындағы Қызылорда мемлекеттік университетіне түсіп, 2007 жылы педагог-психолог мамандығын ойдағыдай аяқтады. Университет қабырғасында жүріп-ақ ол адам жанының терең иірімдерін түсінуге, жас ұрпақтың тәрбиесі мен тұлғалық дамуына үлес қосуға ұмтылды.

Еңбек жолын 2008 жылы Жалағаш ауданындағы №203 орта мектепте бастады. Мұнда ол өз мамандығына сай педагог-психолог ретінде еңбек етіп, мектеп ұжымының және оқушылардың сеніміне ие болды. Жас маман ретінде балалардың жан дүниесін түсінуге, олардың бойындағы қабілетті ашуға ерекше мән берді. Әрбір оқушының тұлға болып қалыптасуына ықпал ету – оның басты ұстанымдарының бірі болды. Осы жылдар ішінде ол тек кәсіби маман ғана емес, мектептің қоғамдық өміріне белсенді араласатын ұстаз ретінде танылды.

2016 жылы тағдыр жолы оны Шиелі ауданына алып келді. Осы өңірге келін болып түскен Ақмарал Сұлтанбекқызы жаңа ортада да өз ісіне адалдық танытып, білім саласындағы қызметін жалғастырды. 2018 жылдан бастап Шиелі ауданы бойынша білім бөлімінің әдістемелік кабинетінде әдіскер қызметін атқарып келеді.

Әдіскер ретінде оның негізгі міндеті – мектептердегі әлеуметтік педагогтар мен кітапханашылардың жұмысын үйлестіру, олардың кәсіби дамуына бағыт-бағдар беру. Ол білім беру ұйымдарымен тығыз байланыс орнатып, тәжірибе алмасу, әдістемелік көмек көрсету жұмыстарын жүйелі түрде ұйымдастырады. Әлеуметтік педагогтардың жұмысын жетілдіру, мектеп кітапханаларының қызметін дамыту, білім ордаларындағы тәрбие мен рухани құндылықтарды нығайту – оның күнделікті еңбегінің маңызды бөлігі.

Ақмарал Сұлтанбекқызының тағы бір ерекшелігі – оның баспасөзге деген жанашырлығы. Ол ақпарат пен білімнің, рухани құндылықтың қоғамға таралуында басылымдардың маңызы зор екенін терең түсінеді. Сондықтан да білім саласындағы жаңалықтарды, игі бастамаларды насихаттауға, газет-журналдардың мазмұнды болуына қолдау көрсетуге әрдайым ықылас танытады. Оның пікірінше, баспасөз – қоғам мен білім ордасының арасындағы алтын көпір.

Білім мен руханиятты қатар ұлықтаған мұндай азаматтардың еңбегі қай кезде де бағалы. Өз ісіне адалдық танытып, жас ұрпақтың болашағына қызмет ету – нағыз ұстазға тән қасиет. Ақмарал Сұлтанбекқызының еңбек жолы да осының айқын дәлелі.

Қоғамдық өмірге белсене араласып, білім саласының дамуына өз үлесін қосып жүрген, басылымға жанашырлық танытқан осындай азаматтардың еңбегі көпке үлгі. Себебі білім мен ақпараттың тоғысқан тұсында ғана ұлттың рухани әлеуеті арта түседі.