Қоғамның даму тарихын парақтасақ, ең ұлы істердің бәрі қарапайым еңбек адамдарының маңдай терімен жүзеге асқанына көз жеткіземіз. Адамзат өркениетін алға жетелеген күш – байлық та, билік те емес, еңбек. Ал еңбегіне адалдық танытқан халық қана өз болашағын жарқын ете алады.

Қызылорда өңірінде Еңбек күні қарсаңында өткен «Адал еңбек – адал азамат» атты салтанатты жиын осы шындықты тағы да айқын көрсетті. Бұл шарада марапаттардан гөрі елдің еңбегіне берілген үлкен баға, халықтың бірлігін нығайтатын қуатты идея жатты. Жиынның ең ­басты жаңалығы – Шиелі ауданының «Үлгілі аудан» атануы болды. Бұл мәртебе – аудан тұрғындарының қажырлы еңбегінің, ынтымағының және жүйелі жұмысының жемісі.

2025 жыл – еліміз үшін ерекше жыл. Президент Қасым-Жомарт Тоқаевтың бастамасымен бұл жыл «Жұмысшы мамандықтар жылы» деп жарияланды. Бұл бастама еңбек адамының қоғамдағы беделін арттыруға, жұмысшы кәсіптерінің маңызын дәріптеуге бағытталған. Облыс әкімі Нұрлыбек Нәлібаев салтанатты шарада сөйлеген сөзінде осы бастаманың мәнін терең түсіндірді: – Президентіміз Қасым-Жомарт Кемелұлы 2025 жылды «Жұмысшы мамандықтары жылы» деп жариялап, «Біз жұмысшы мамандықтарын дәріптеу арқылы қоғамда еңбеккеш және нағыз маман болу идеясын насихаттаймыз! Адал әрі табанды еңбегімен табысқа жеткен адамдар қашанда құрметті, сыйлы болуы керек» деді. Бұл – экономикалық тұрақтылық пен әлеуметтік прогрестің басты факторы ретінде жұмысшы кәсіптерінің рөлін күшейтудегі стратегиялық қадам. Ұлтымыздың ұлы мұраты жолында, еңбек майданында ата-бабаларымыз тер төкті. Олардың арасынан 1792 Социалистік Еңбек Ері шықса, 102-сі Сыр өңірінің еңбеккерлері. Өз мектебін құрып, шәкірт тәрбиелеген, Сыр күрішінің даңқын асқақтатқан дала академигі, екі мәрте Социалистік Еңбек Ері атанған Ыбырай Жақаевтың, Сәлима Жұмабекованың орны ерекше. Осындай ұлы ұстаздың тәлімін алған, бала тәрбиелеп, ұлтжандылықпен қызмет а т қ а р ғ а н Ш ы р ы н к ү л Қазанбаева, Ұлбала Алтайбаева бастаған С ы р д ы ң б а т ы р аналарының қажырлы еңбегі ұрпақ жадында мәңгі сақталады. Алдыңғы буынның өнегелі ізін жалғап, Тәуелсіз еліміздің тарихында «Қазақстанның Еңбек Ері» атанған Роза Бағланова, Әбдіжәміл Нұрпейісов, Асқар Жұмаділдаев, Юрий Пя, Абзал Ералиев, Имамзада Шағыртаев сынды жерлестерімізді әрдайым мақтан етеміз. Егемен еліміздің жарқын болашағы жолында Отанымызға адал еңбек ету, адал жолмен табыс табу, адал азамат болу – біздің қастерлі міндетіміз! Баршаңызды мерекемен тағы да құттықтап, облысымыздың дамуына қосқан орасан зор үлестеріңіз үшін Сыр жұртшылығының, Өзімнің атымнан шынайы алғысымды, зор ризашылығымды білдіремін, – деді аймақ басшысы. Оның бұл сөзі залдағы әр адамның бойына мақтаныш пен жауапкершілік сезімін ұялатты.

Шиелі ауданының «Үлгілі аудан» атануы кездейсоқ емес. Соңғы жылдары ­аудан ауыл шаруашылығы, инфрақұрылым, әлеуметтік сала сияқты түрлі бағытта жүйелі әрі нәтижелі жұмыстар атқарып келеді. Бұл жеңіс – тек аудан әкімдігі мен билік органдарының еңбегі ғана емес, әрбір ауыл тұрғынының маңдай терінің нәтижесі. Салтанатты шарада облыс әкімі ауданға төрт бірдей коммуналдық техника табыс етті. Олар: екі трактор, бір жүк көтергіш және жүк көлігі. Бұл техникалар ауылдардың көркеюіне, көшелердің тазалығы мен жолдардың сапасын арттыруға бағытталады. Олар – ауданның жаңа тынысы, әрі еңбек өнімділігін арттырудың басты кепілі. Сонымен қатар тірек және серіктес елді мекендер санатына кірмейтін ауылдарды қолдау мақсатында Майлытоғай ауылдық округіне 15 миллион теңге көлемінде сертификат табысталды. Бұл қаражат ауылдың келбетін жаңартып, тұрғындардың өмір сапасын арттыратын маңызды жобаларға жұмсалмақ. – Бүгінгі марапат – бүкіл Шиелі халқының ортақ еңбегінің нәтижесі. Біз әр ауылдың дамуына тең мүмкіндік жасауға күш саламыз. Шиелі – еңбек пен бірліктің символына айналуы тиіс, – деді аудан әкімі марапаттау сәтінде.

Шиелінің бүгінгі жеңісі – тек бір күндік қуаныш емес, үш жылға созылған табандылық пен жүйелі еңбектің айқын жемісі. Бұл жетістікке аудан біртіндеп, сатылы түрде көтерілді. 2023 жылдың қарашасы – алғашқы үлкен серпіліс. Шиелі І орынды иеленіп, ауданға коммуналдық қызметті күшейтуге арналған 3 техника сыйға берілді (арнайы жол тазалағыш КамАЗ, жер қазушы трактор, қалдық тасымалдаушы КамАЗ). Ал 2024 жыл – келесі биікке қадам. «Үлгілі аудан орталығы» номинациясында ІІ орынға табан тіреп, тағы 3 жаңа техника қосылды (қалдық тасымалдаушы КамАЗ, жол тазалағыш трактор және ассенизатор көлігі). Ал биыл Шиелі аудан тарихында алғаш рет ең жоғарғы мәртебеге – «Үлгілі аудан» атағына қол жеткізді. Бұл жеңіспен бірге 4 жаңа техника (2 трактор, 1 жүк көтергіш, 1 жүк көлігі) аудан қорына табыс етілді. Үш жылдың қорытындысында Шиелі 10 жаңа техникамен толықты. Бұл тек цифр емес – бұл ауыл көшелерінің таза әрі жарық болуы, халыққа қызмет сапасының жақсаруы, ең бастысы, бірлік пен еңбектің жеңісі. Шиелі бүгін – үлгі аудан, ертең – өңірдің көшбасшысы! ЕҢБЕК МАЙТАЛМАНДАРЫ – ­БАСТЫ КЕЙІПКЕР

Шарада еңбек озаттары да лайықты марапатталды. «Үздік еңбек әулеті», «Жастар тәлімгері», «Өндірістің үздік жас маманы» номинациялары бойынша жеңімпаздарға қаржылай сыйақылар табыс етілді. Сонымен қатар 15 маманға облыс әкімінің Алғыс хаты және 500 мың теңгелік сертификаттар берілді. Тағы 15 адамға шипажайға жолдама ұсынылды. Сол құрметке лайық жандардың бірі – Шиелі ауданының мақтанышы, «Ақмая» шаруа қожалығының бригадирі Гүлсім Әбілқасымқызы Дәрібаева. Ол өзінің табанды еңбегі мен жас мамандарға деген қамқорлығының арқасында «Жұмыс істейтін жастардың үздік тәлімгері» номинациясы бойынша «Алтын» жүлденің иегері атанды. Гүлсім Әбілқасымқызы – тек еңбек адамы ғана емес, нағыз тәлімгер, нағыз үлгі. Күріш өсіруде жоғары көрсеткішке жетіп қана қоймай, өз тәжірибесімен бөлісіп, ауыл жастарын еңбекке баулып келеді. Оның еңбегі – тек өнім өсіру емес, жастардың болашағына бағыт беру, ауылдың әлеуетін арттыру. Бұл жеңіс – жеке марапат қана емес, Шиелінің адал еңбектің символына айналғанын дәлелдейтін сәт. Гүлсім апайдың табысы барша жас буынға: «Еңбек етсең – еленесің, тер төксең – төбең көкке жетеді» деген үндеу іспетті.

Шиелі ауданының бүгінгі жеңісі – бүкіл Қызылорда облысының мақтанышы. Бұл – тек төрт жаңа техника мен 15 миллион теңгелік сертификат емес, ең бастысы – еңбекқорлық пен бірліктің нәтижесі. Бұл жеңіс бізге мына ақиқатты дәлелдеді: Еңбек – елді өркендетеді, бірлік – болашақты нығайтады, адалдық – табыстың кепілі. Шиелі бүгінгі күні осы үш құндылықты бойына сіңірген аудан ретінде танылып отыр.