Есіл мен Сыр – екі өзен. Екеуі де өз жолымен ағып жатыр. Бірақ олардың арасындағы бір ортақ ағыс бар: ол – Тәуелсіз Қазақстанның даму соқпағы. Бірі – елорданың жанында, екіншісі – Сыр елінің жүрегінде. Бірақ екеуін де бір идея, бір мұрат, бір рух ­байланыстырады.
Астана аспанмен тілдескен ақ арман болса, Шиелі – топырақпен тамырласқан тіршілік. Бірі бағыт көрсетсе, бірі сол жолмен жүріп келеді. Екеуінің үндестігі – Тәуелсіз Қазақстанның тұтастығы.

Шиелінің қара жерінен көктеген арман көп. Сол арман Есілдің жағасындағы Елордаға жетіп, сәулетімен сәулеленді. Астана – зияткерлік орталық. Мұнда мемлекеттің стратегиялық жүйкесі орналасқан. Заң шығады, жоспар түзіледі, реформа басталады.

Ал Шиелі – еңбек пен өнегенің ошағы. Мұнда көктемде кетпен шауып, жазда тер төгетін, күзде қырманға қарасып, қыста тыным таппайтын ауыл адамы бар. Бұл жерде адам жермен сөйлеседі. Көкөніс пен жүгері, қауын мен мақсары – барлығы еңбекпен біткен. Осы киелі мекендегі адамдар көкке қарап арман құрмайды. Олар жерге қарап шүкір етеді. Сол шүкірлік – елорданың шын өркендеуіне дем береді.

Ауыл – барлық үлкен өзгерістің алғашқы сынақ алаңы. Астанада ойлап табылған «Ауыл аманаты», «Жер аманаты», «Жайлы мектеп» сынды іргелі жобалар дәл осындай аудандарда іске асады. Сол жобаларды өмірге енгізетін де, нәтижесін сезінетін де – шиелілік шаруалар мен жас мамандар. Мәселен, өткен жылы қабылданған «Ауыл аманаты» бағдарламасы алғаш рет Есіл бойында мақұлданып, бүгінде Сыр бойында, соның ішінде Шиеліде сәтті жүзеге асып келеді. Ауыл кооперативтері құрылып, еңбек етем дегендерге 2,5%-пен жеңілдетілген несие берілді. Бұл – Сыр мен Есіл арасындағы «ақылды диалогтың» нәтижесі.

Астана – Қазақстанның символы. Ол – заманауи ойлау, прогресс, болашақтың бет-бейнесі. Бірақ сол болашаққа жол салып келе жатқан ауылдар бар. Шиелі – сондай тірек. Бәйтерек те тамырсыз өспейді. Ал тамыр – ауылда.

Есіл мен Сыр – екі арна. Астана мен Шиелі – екі нүкте. Бірақ олар бір бағытта ағып жатыр. Сол кезде ел дамиды. Бірі – өткеннің үні болса, екіншісі – болашақтың демі. Екеуі қатар аққанда, қазақ елі алға басады. Қос арна бір ағысқа айналғанда ғана – тұтас ұлттың тынысы кеңейеді.