Биыл жиырма жетінші рет ұйымдастырылған шара «Бекзатхан» тойханасында өтті. Мерекеге жиналған балғындар «Арман» мәдениет үйінің өнерпаздарынан құрылған артистердің ертегілік қойылымын тамашалап, ғажайыпқа толы шырша мерекесінің қонағы болды. Ал «Қайырымдылық жасасаң, қайырын өзің көрерсің» деген тәмсілді ұстанатын Бекзатхан Бауыржанұлы әр балаға сый-сияпат табыстады. Салтанатты кештің шырайын келтірген Аяз ата мен Ақшақарда өз өнерін ортаға салған бүлдіршіндерге сыйлық үлестірді. Сондай-ақ шара барысында ата-аналар арасынан сайланған әділ қазы мүшелері ең үздік шыққан 10 өнерпазға номинация беріп, марапаттады.

Алғаш рет 1998 жылы көлемі 24 шаршы метр ғана болатын азық-түлік дүкенінде көршілердің 20 баласын қатыстырып шағын ғана мерекелік іс-шара өткізген Бауыржан Еламан мен Айткүл Əбдіқадырова бұл шараның бүгінде дəстүрлі мерекеге айналарын сол кезде ойламаған да болар.

– Былдырлап тілі шыққан кезінен бастап есейіп, ержеткенше шыршаға келетін балалар жетерлік. Олар біздің көз алдымызда өсіп келеді. Отбасымызбен ұйымдастырған мерекелік шарамыз осылай жалғасын тауып жатқанына қуаныштымын. Балалардың бал-бұл жанған жүздерін көруден асқан бақыт жоқ, – дейді кәсіпкер А.Әліқызы.

Расында, бұл шырша балақайлардың ешқандай ескертіп, шақырусыз өздері келулерімен айрықша, сонысымен бағалы. Кеш соңында ақ жаулықты әжелер ұйымдастырушыларға алғысын айтып, ақ батасын берді. Осылайша мерекеге жиналған қауым көтеріңкі көңілмен тарқасты.