Қызылша – елімізде күн тәртібінен түспей отырған мәселе. Жағдай ушықпаса, жақсарып тұрған жоқ. Бүгінгі таңда Шиелі ауданында қызылшамен сыртқаттанушылық бойынша эпидемиологиялық ­ахуал тұрақты емес. Аудандық санитариялық-эпидемиологиялық бақылау басқармасының басшысы Г.Айтекеева брифингте дәл осылай деді.
Г.Айтекееваның айтуынша, бүгінге дейін 233 науқас қызылша дертіне шалдыққан. Оның 86,7 пайызы 14 жасқа дейінгі балалар. Әсіресе, мұнда 1-3 жасқа дейінгі балалардың үлесі басым.

– Қызылша ауруының алғашқы жағдайы 29 наурызда тіркеліп, аурушаңдық бойынша күрделенуі қараша айынан бастап орын алуда. Бұл – ауамен тарайтын, бір басталса қызыл жалындай дес бермейтін дерт. Ауру жұққан науқас саны күн сайын емес, сағат сайын өсетінін ұмытпаған жөн. Негізінен қызылша ­ауруы екпе алмағандардың арасында кеңінен тарап отыр. Санға шағып айтсақ, ауданда 932 бала ­жоспарланып, бүгінгі күнге дейін 807 бала егумен толықтай қамтылды. Бұл 86,6 пайызды құрап отыр. Ал 2-4 жас аралығындағы 5858 бала екпе алуы керек деп жоспарланса, оның тек 2702-сі ғана жоспарлы екпелерін алған, – деді басқарма басшысы.

Қызылшаның алдын алудың ең тиімді және сенімді әдісі вакцинация болып табылады. Қызылшадан егу – вирусты жасанды жолмен тоқтату, нәтижесінде ағза өзін қорғайтын иммунитет жасайды. Ең алғашқы вакцинацияны балаларға 12 айлығында, екіншісін 6 жаста жасалады. Егу тұрақты қорғанысты тудырады. Қызылшаға қарсы қосымша егулер науқаспен қатынаста болған қызылшаға қарсы егулері жоқтарға, эпидемиологиялық көрсеткіші бойынша 30 жасқа дейінгі адамдарға салынады.