– Ұлы ойшыл Абайдың «Адамзаттың бәрін сүй, бауырым деп» – деген өсиетін негізге ала оты­рып, қасиетті қазақ халқы қиын-қыстау кезеңдерде тағдырдың тәлкегімен бізді өз бауырына басқан болатын. Сол уақыттағы қазақ жұрты өзінің қиыншылықтарына қарамастан өзге ұлттардың қайғысына ортақтығын танытқан еді. Біз тоталитарлық езгі қыспағымен қазақ даласына бас сауғалап келдік. Өз Отанынымызды қазақ жұртшылығынан тапқан қаншама этнос өкілдері мәңгілікке қазақ жерінде тұрақтап қалып, күні бүгінге дейін өсіп-өніп өз ұрпақтарын жалғастырып келеді. Тамырын кеңге жайып, Сыр өңірінен біздің отбасымыз да пана тапты. Яғни сол қиын-қыстау кезеңдерде Шиелі ауданына ата-анамыз қоныс аударды.
Менің есімім – ­Зенфира. Әкемнің есімі – Забиолла. Қазіргі таңда өзге ұлт өкілі болсақ та, Шиелі халқының қонақжайлылығының арқасында тату-тәтті тұрып жатырмыз. Өзім №252 Г.Н.Ковтунов атындағы мектепте мұғаліммін. Аудан халқы үшін еңбек етіп, ұстаздық жолда барымды салуға тырысып жатырмын. «Халықтар достығы» жәй айтылған сөз емес. Әр кезеңдерде қазақ елі өзінен пана іздеп келгендердің бәрін бауырына басып, төрінен орын беріп, қандай қиын кезеңдердің өзінде бір үзім нанды бөліп жеді. Сөйтіп қаймағы бұзылмаған көпұлтты мемлекет болдық. Бүгінде түрлі ұлттар мен ұлыстардың барлығы бір шаңырақ астында бір үйдің баласындай ғұмыр кешіп келеміз.

Қазақ қашан да бауырмал халық. Әрқашан татумыз, дос­пыз және бір-бірімізбен қойын-қолтық араласа өмір сүрудеміз. Барлығымыз туған жердің төсінде, құшағын жайған бейбіт елдің ішінде ел бірлігін сақтауға атсалысып, келісімге, бірлікке өз үлесімізді қосудамыз. Қазақ халқының қанына сіңген осы берік бірлігі, ұйымшылдығы, басқа халықтармен одақтасуы, достасуы жеңістен жеңіске жеткізуде. Оған халық және тарих куә!

Құрметті Қазақ елі! Сіздерді 1 мамыр – Қазақстан халқы бірлігі мерекесімен шын жүректен құттықтаймын! Туған Отанымыз – Қазақстан гүлденіп, тұрақтылық пен бейбітшілік мекені бола берсін. Береке-бірлігіміз артып, еліміз аман, жұртымыз тыныш болсын!