20 қаңтар күні өткен сенат отырысында сенатор Нұртөре Жүсіп Алматы трагедиясына «Ұлттық идеологиядан кеткен үлкен олқылық», – деп баға берді. Сондай-ақ, ол үкіметтің ұлттық құндылықтарды дамыту жөніндегі жұмысын сынға алып, жастарды адамгершілікке тәрбиелеу керек екенін айтты.
Депутаттың пікірінше, қазір «Алматы трагедиясына» үлкен мән беріп, осы оқиғалардан сабақ алу маңызды. «Ұлттық идеология, ұлттық тәрбие мәселесінде үлкен олқылыққа жол бердік. Мұны ашық айту керек. Патриоттық сезімді оятып, бұл – менің мемлекетім, менің Қазақстаным деудің орнына ақша табу, тез байып кету, барлық құндылықты ақшамен өлшеуді алға қойдық. Бүгінгі жастар ата-бабамыз тыйым салған дүниеден, көрсеткен өнегеден емес, TikTok арқылы тәрбиеленеді. Қоғамда жанашырлықтың, сүйіспеншіліктің, қамқорлықтың, аяушылықтың, ризашылық пен ізгіліктің, қайырымдылық, сыпайылық пен құрметтің орнына қатыгездік, озбырлық, алдау, өтірік, өсек, мақтаныш, кек үстемдік құрды. Өз ошағын, мүлкін тонауға дайын, өз әрекеттері туралы бір сәтке де ойланбайтын қанішерлер қайдан шықты? Мұндай ұрпақ қайдан пайда болды?», – деді сенатор Сенат ­отырысында.

Оның айтуынша, ұлттық идеология мен ұлттық тәрбиені дамытуда айтарлықтай кешігіп қалдық. Дегенмен сенаторлар бұл мәселені үкімет алдында бірнеше рет көтеріп, тіпті осы саладағы жағдайды жақсарту бойынша нақты ұсыныстар жіберген.

«Құрметті Әлихан Асханұлы, тағы да назар аударуды талап етеміз. Былтыр Сенатта ұлттық құндылықтарды сақтау және одан әрі дамыту мәселелеріне арналған парламенттік тыңдау өтті. Тыңдауға қатысушылар көптеген мәселені көтеріп, жұмыс қорытындысы ­бойынша үкіметке ұсыныстар берді. Осы ұсыныстарға қайта назар аударып, үкіметтің барлық мүшесін парламенттік тыңдау материалдарымен таныстырып, оларды жүзеге асыру бойынша шұғыл шаралар қабылдау маңызды деп санаймын», – деп толықтырды Нұртөре Жүсіп.

«Қазір мемлекеттік және жеке басылымдарға, балалар басылымдарына мемлекет тарапынан материалдық қолдау көрсетуді талап етемін. Мәдениет және спорт министрі, мәдениет саласында да құндылықтардың маңызын жүйелеп, жаңартатын, ерекше көңіл бөлетін кез келді. Балаларымыздың бойына ұрлық жасамау, адал өмір сүру туралы ойларды сіңіретін уақыт келді.

Білім министрі Асхат Аймағамбетов мырза, Абай айтқандай, надандық білімсіздіктен туады. Адамдардың бойына кітапқа деген сүйіспеншілік қалыптастыру керек. Еңбек және халықты әлеуметтік қорғау министрі Серік Шәпкенов мырза, Қазақстанда жұмыссыз қазақтар болмауы керек, нәтиже бермейтін бағдарламалардың күшін жою керек. Ұлттық бағдарламаларды халыққа түсінікті етіп жасаңыздар», – деді сенатор.