Өскен өңір Osken-onir.kz ақпараттық агенттігі
» » Жаны жайсаң Нәйла!

Жаны жайсаң Нәйла!

Қазақта «Тектіден текті туады, тексіздік тұқым қуады» деген келелі сөз бар. Нәйла Әбілқасымқызы осындай текті жерден шыққан.Олай дейтінім, мен бұл отбасына сонау 60-70 жылдардан білемін. Әкесі де, анасы да сауатты, білімді кісілер болатын. Әкесі Әбілқасым ағамыз Ұлы Отан соғысының ардагері, түрлі салада қызмет атқарған қызметкер де, анасы Нағима баспагер, бас­пахана басшысы болып көп жыл еңбек етті. Нағима апай, Мәриям Жұматова, Мария жеңгеміз - үшеуі бір жерде қызмет атқарды, шексіз сыйласа білді. Сол кездегі Шиелінің тұрғындары үш достың жүріс-тұрыстарына, сыйластығына сырттай да, іштей де, қызыға, сүйсіне қарайтыны әлі есімде! Үшеуінде де ерекше, басқаларға үлгі боларлық қасиеттер көп еді. Мариям апай ақын, Нағима апай білікті басшы, Мәрия жеңгеміз мықты есепші болды. Нағима деген анадан туған, Мариям, Мария сияқты аналардың үлгілі қасиеттерін көріп өскен Нәйла қалай жаман болсын. «Ұяда не көрсең, ұшқанда соны ілерсің» деген емес пе?
Осындай тәрбиелі ортада өскен Нәйла жас­тайынан пысық, алғыр болды. Кейін өсе келе ұстаздық жолды таңдап, 1982 жылы педагогикалық институттың орыс тілі мен әдебиеті бөлімін бітіріп, қиын да қызықты ұстаздық жолға түсті.
Мен Нәйла Палымбетқызын тәрбие саласында жұмыс атқарып жүрген кезінен білетінмін. Ол ашық жарқын мінезімен, ешкімді жатырқамайтын кеңпейілділігімен, білімділігімен таныла бас­тады және қызмет бабында тез өсті. Оның ­бойында ерге тән ерлігі де, өрлігі де бар. 1986 жылдан бастап аудандық білім бөлімінде әдіскер, №244 мектепте ұстаз, аудан әкімінің орынбасары қызметтерін атқарды. Ал, 2001 жылы аудандық білім бөлімінің меңгерушісі қызметіне келді. Нәйла бұл қызметке келгенге дейін аудандық білім бөлімін жиырма жылдан аса Ж.Зермұхамбетов ағамыз басқарды. Ол кезде Шиелі ауданының білім бөлімінің жұмысы республикаға танымал болған еді. Осы жұмыстарды Нәйла Палымбет әрі қарай дамыта түсті. Ол ұстаздардың біліктілігі мен оқушылардың білім сапасына, тәртіп пен тәрбие мәселесін көтеруде қатаң талап қоюдан бастады. Нәйла аудандық білім бөлімінің меңгерушісі қызметінен кейін бірнеше мекемеде басшылық қызмет атқарды. Қандай қызметтерді атқарса да өзінің жауапкершілігімен, сауаттылығымен, жоғары деңгейдегі ұйымдастырушылық қабілетімен ерекшеленетін, әріптестері арасында үлкен беделге ие басшы бола білді. Ол барлық қоғамдық жұмыстарға да белсене атсалысады. Қазір Шиелі аудандық әйелдер кеңесінің төрайымы.
Жүсіп Баласағұнның «Жақсы адам ғана жақсы басшы бола алады» деген сөзі де осы Нәйлаға арналғандай. Тарихты жасайтын – тұлғалар. Ендеше Шиелі топырағы ешқашан тұлғалардан кенде болмаған. Даңқы елге таралған даналарымыз бен қайраткерлеріміз қазір де бар, келер ұрпақтың да тізімді жалғастырары кәміл.

Абай Баукенұлы,
зейнеткер - ұстаз
Қазақстан Республикасының білім беру ісінің үздігі
22 қазан 2021 ж. 292 0