Тәрбие басы – тал бесік
«Тәрбие тал бесіктен басталады» демекші сәби дүниеге келген сәттен бастап оның тәрбиесімен айналысу керек. Бұл тұрғыда ата-ана мен отбасының атқарар рөлі зор. Ал уақыт өте баланың бұғанасы қатқаннан кейін ол әртүрлі ортадан тәлім алады. Осы орайда бүлдіршіннің тәрбие алатын алғашқы баспалдағы – балабақша. Иә, бүгінде балабақшаның тәрбиеленушілері жан-жақты білім алып, өздерінің ой-өрісін дамытып жүр. Соның бір дәлелі – Еңбекші ауылындағы «Нұр-бөбек» бөбекжай бақшасы.Жуырда аталған балабақшада тәрбиеші Ұлбазар Нарикбаеваның ұйымдастыруымен «Көлеңкелі театр» тақырыбында шеберлік сағаты өтті. Бұл сабақта бүлдіршіндер театрдағы тың өнермен танысты. Сондай-ақ театр түрлері сан қырынан зерттеліп, тәрбиеленушілер ерекше әлемге тап болғандай әсер алды. Ертегі мен әдеби шығармаларды жақсы көретін балалар өз қызығушылығын жасыра алмады. Айта кетейік, қазіргі таңда осы балабақшада әртүрлі рөлді сомдау мен қойылымдар қою үздіксіз жүруде. Міне, осылайша балабақша тәрбиешілері балалардың көңілін көтеріп қана қоймай, қазақы ертегілермен сусындауды да қолға алған.
Маржан БОЛАТҚЫЗЫ
