Инвестициялар және даму министрлігінің Құрылыс және тұрғын үй-коммуналдық шаруашылық істері комитетінің төрағасы Марxабат Жайымбетовтың айтуынша, «Нұрлы жер» бағдарламасымен үй алу үшін қазақстандық отбасы 150 мыңнан 200 мың теңгеге дейін табыс табуы тиіс.«Бүгінгі таңда Тұрғын үй құрылыс жинақ банкі салымшыларының саны 1 миллионға жуықтады. Биылғы жылмен салыстырғанда былтыр бұл көрсеткіш 250 мыңға аз болды. Мемлекеттік бағдарлама бойынша өңірлерде баспана құнын 1 шаршы метрге 140 мың теңге, Алматы, Астана, Атырау мен Ақтауда 180 мың теңге деп есептедік.
Мәселен, 50 шаршы метрлік екі бөлмелі пәтер өңірлерде 7 миллион теңге, ал қалған төрт қалада 9 миллион теңге болады. Ай сайын 50-70 мың теңгеден төлеп отыру, меніңше, орташа табысы 150 мың мен 200 мың теңге аралығында болатын отбасы үшін жақсы. 7-10 жыл аралығында пәтердің құнын төлеп бітіруге болады», - дейді Марxабат Жайымбетов.
Айта кетейік, бұл жерде Тұрғын үй құрылыс жинақ банкінің салымшылары үміткер бола алатын несиеге берілетін баспана туралы сөз болып отыр.