Жаңа тігін цехы

Жаңа жыл мерекесі қарсаңында Бидайкөл ауылындағы клуб үйінен тігін цехы ашылды. Бұл – кент ішінде орналасқан Береке сауда орталығындағы «Тоғжан» тігін шеберханасының филиалы.
Кент орталығындағы цехта 13 адам жұмыс жасаса, жаңа кәсіптік нысан 5 ауыл тұрғынын жұмыспен қамтып отыр.
– Биылғы жыл облыс бойынша жаппай кәсіпкерлікті дамыту жылы ретінде аталды. Соның аясында біршама шағын кәсіпорындар ашылды. Тігін шеберханасы әр ауылға керек-ақ. Жалпы, кәсіпкерлік нысанның клуб үйінің ішінен ашылғаны құптарлық іс. Өзге ауылдардағы мәдениет ошақтарының бос бөлмелерін де ел игілігіне жаратар пайдалы орындарға айналдыру қажет, – деді аудан әкімі Ә.Оразбекұлы. Шеберхананың лентасы салтанатты түрде қиылып, жиналғандар кәсіпкер Тоғжан Мұсаеваға сәттілік тіледі.

Хан СӘБИТ.