Жуырда аудан әкімі Айтбай Жандарбеков тиісті сала басшыларымен бірге «Шиелісушар» өндірістік учаскесінің теңгеріміндегі аталған каналдағы жұмыстарды көзбен көріп, атқарылып жатқан шаралардың қарқыны мен сапасына назар аударды. Қазіргі таңда нысанда бес бірдей арнайы техника үздіксіз жұмыс істеуде. Қазіргі таңда каналда бес бірлік арнайы техника тоқтаусыз жұмыс істеуде. Атап айтқанда, үш экскаватор арнаның түбін тереңдетіп, жылдар бойы жиналған лай мен шөгінділерді аршып жатыр. Ал екі ауыр жүк тиегіш көлігі тазаланған қалдықтарды тасымалдауға жұмылдырылған. Жұмыстар бекітілген жоспарға сәйкес кезең-кезеңімен жүргізіліп, әр учаскенің су өткізу мүмкіндігін арттыруға басымдық берілуде. Бұл көзге көріне бермейтін, бірақ нәтижесі мол еңбек.

«Шиелісушар» өндірістік учаскесінің басшысы Дихан Әубәкіровтың айтуынша, механикалық тазалау жұмыстары ҚР Су ресурстары және ирригация министрлігі мен «Қазсушар» РМК Қызылорда филиалының қолдауымен жүзеге асырылып отыр. Мемлекеттік деңгейдегі мұндай қолдау – су шаруашылығы саласына деген жауапкершіліктің артқанын білдіреді. Себебі Р-12 шаруашылықаралық каналы арқылы ауданның егістік алқаптарының шамамен 40 пайызы сумен қамтамасыз етіледі. Тиісінше бір ғана арнаның бүтін бір ауданның аграрлық әлеуетіне тікелей әсер ететінін көрсететін нақты көрсеткіш.

Өткен жылы орын алған су тапшылығы диқандарға оңай соққан жоқ. Кей алқаптарда өнім төмендеп, кей шаруалар шығынға батты. Осындай жағдайдың биыл қайталанбауы үшін Р-12 каналын тазалау жұмыстары бірінші кезектегі міндет ретінде айқындалып, күн тәртібіне шығарылды. Табиғаттың тосын мінезіне алдын ала дайындалып, мәселені түп-тамырымен шешуге ұмтылған жүйелі саясаттың көрінісі. Су арнасы уақытылы тазаланса, су ысырап болмайды, егіс те өз уақытында ылғал алады.

Аудан басшысы жұмыс барысымен танысу кезінде механикалық тазалау жұмыстарын су алу маусымы басталғанға дейін толық аяқтауды қатаң тапсырды. Сонымен қатар жауапты сала жетекшілеріне техникалардың тиімді пайдаланылуын, жұмыстардың сапалы әрі белгіленген мерзімде орындалуын қамтамасыз ету жөнінде нақты міндеттер жүктеді. Әлбетте, бақылау мен талап бар жерде нәтиже де болатынын аңғартатын ұстаным.

Су – тек табиғи ресурс емес, ол – тіршіліктің, еңбектің, берекенің бастауы. Ал сол суды егістікке жеткізетін арналар – ауыл өмірінің күретамыры. Р-12 шаруашылықаралық каналының тазалануы – бір реттік науқан емес, ол болашаққа бағытталған инвестиция, диқандардың маңдай терін қорғауға жасалған нақты іс. Осындай мақсатты, жүйелі жұмыстар арқылы ғана ауыл шаруашылығының тұрақтылығы сақталып, елдің азық-түлік қауіпсіздігі нығаяды. Бүгін тазаланған арна – ертең жайқалған егін. Ал сол егін – халықтың ырысы мен елдің берекесі.