Кейде бір күннің өзі бір жылға татиды. Ал кейде бір форум тұтас бір дәуірдің бағыт-бағдарын айқындап береді. Бұдабай Қабылұлы атындағы аудандық мәдениет үйінде өткен «Шиелі жастар форумы – 2025» дәл осындай мағынасы терең, мазмұны салмақты, рухы биік басқосулардың санатына қосылды. Сәйкесінше есеп беретін жиын емес, ел ертеңіне қатысты ой сүзгіден өткен, жауапкершілік пен сенім астасқан алаң болды.
Форум шымылдығы түрілген сәттен-ақ оның әдеттегі ресми жиындардан өзгеше екені сезілді. Мінберге көтерілген аудан әкімі ­Айтбай Жандарбеков жастарға қарата сөйлеген сөзінде бір ғана дерекке тоқталып өткен жоқ, бір ұрпақтың тағдырына тікелей әсер ететін шындықты айтты. Аудан басшысы Шиеліде 14 пен 35 жас аралығындағы жастар саны 27 545 адамды құрайтынын, бұл аудан халқының 30,2 пайызы екенін атап өтті. Бұл көрсеткіш жастарды тек әлеуметтік топ ретінде емес, ауданның стратегиялық ресурсы ретінде қарастыру қажеттігін айқын көрсетеді. «Жастар – біздің ресурсымыз емес, жауапкершілігіміз» деген ой форумның негізгі философиясына айналды. Өйткені жастарға мүмкіндік беру – болашаққа салынған ең сенімді инвестиция.

2025 жылы жастар саясатын жүзеге асыруға жергілікті бюджеттен 46,3 миллион теңге бөлінуі – сөз бен істің бір арнада екенін білдіреді. Бұл қаржы жастардың бос уақытын тиімді ұйымдастыруға, білімін арттырып, кәсіби дамуына бағытталған жобаларға жұмсалуда. Жыл басынан бері өткен 127 іс-шараға 8 мыңға жуық жастың қатысуы осы жұмыстың нақты нәтижесі.

Форум барысында Мемлекет басшысы Қасым-Жомарт Тоқаевтың 2025 жылды «Жұмысшы мамандықтар жылы» деп ­жариялауы да терең мәнге ие болды. Бұл бастама – еңбек адамының қоғамдағы беделін арттыруға, нақты кәсіп пен шынайы еңбекті бағалауға бағытталған. Қазіргі жастар үшін диплом ғана емес, шеберлік пен тәжірибе де табыстың кілті екенін ұғындыратын маңызды бағдар.

Шиелі жастары үшін кәсіпкер болу енді арман емес, нақты жоспар. «Бастау-Бизнес» жобасы жас буынға тек бизнес-жоспар жазуды емес, тәуекелге баруды, жауапкершілік алуды үйретті. Қайтарымсыз грант алған жастар – мемлекеттің сеніміне ие болған жаңа буын.

Ал Skills.Enbek платформасы – ауыл мен қала арасындағы білім алшақтығын жойған цифрлық көпірге айналды. Онлайн курстардан өткен мыңдаған жас еңбек нарығына қажет мамандықтарды игеріп, уақыт талабына бейімделе білді. Соның нәтижесінде ауданда 1300-ден астам жаңа жұмыс орны ашылды. Осыдан жастардың туған жерден табыс ­тауып, ел экономикасына үлес қосып жатқанын аңғаруға болады.

«Жасыл ел», «Дипломмен ауылға», ­жастар практикасы мен қоғамдық жұмыстар жастар үшін уақытша жұмыс емес, тағдырлы таңдау. Ауылға барған жас маман – жаңа ой, серпін, үміт алып келеді. Бұл бағдарламалар арқылы Шиелі ауылдары тек маманмен емес, сеніммен толықты.

Форумда спортта топ жарып, өнерде биік белестерді бағындырған жастардың есімдері аталғанда зал ерекше толқыды. Өйткені олар – жеңістің тірі символы. Олар – «ауылдан шыққан да әлемді бағындыра алады» деген ұғымды дәлелдеген жаңа буын.

Форум аясында қоғамдық өмірге белсене араласып, түрлі салада үздік нәтиже көрсеткен жастар облыс және аудан әкімінің Алғыс хаттарымен марапатталды. Сонымен қатар Қызылорда облысының қоғамдық даму басқармасы жанындағы «Жастар ресурстық орталығы» директоры Әліби Басаров белсенді жастарға марапат табыстады. Бұл – жас буынға көрсетілген сенім мен қолдаудың нақты көрінісі.

Форум соңы ән мен күйге толы мәдени бағдарламамен түйінделіп, қатысушыларға рухани қуат сыйлады. Өткен кеш жастардың бірлігін нығайтқан, ортақ мақсатқа жұмылдырған тағылымды сәт болды. Шиелі жастары бұл күні есеп бермеді, олар ертеңге серт берді. Терең білім мен адал еңбекті өмірлік ұстаным еткен жастар барда, өңірдің де, тұтас елдің де болашағы кемел болмақ.