Өткен аптада «Алтын күз – 2025» ауыл спортшыларының XXXVIII облыстық спартакиадасы өтті. Ол – жай ғана жарыс емес, ауыл спортының әлеуетін айқындайтын, ел рухын көтеретін үлкен мереке. Бір аптаға созылған дүбірлі додада мыңға жуық спортшы бақ сынап, облыстың түкпір-түкпірінен келген командалар намыс жалауын көтерді. Бұл – тек қана спорт емес. Бұл – жас ұрпаққа өнеге, ел бірлігінің айғағы. Әр спортшы туған жерінің намысын қорғап, жүрек түбіндегі жігерін ортаға салды. Ал сол додада Шиелі ауданының спортшылары мәртебемізді асқақтатты.
Бір аптаға жалғасқан дүбірлі додада 1000-ға жуық спортшы 16 спорт түрінен бақ сынады. Бұқаралық спортты дамыту, салауатты өмір салтын қалыптастыру мақсатында ұйымдастарылған ауқымды спорттық іс-шараға облыс аудандары мен қала командалары тартысты бәсекеге түсіп, жоғары деңгейде шеберлік көрсетті.

Айта кетейік, Шиелі ауданының құрамасы 18 спорт түрінен бақ сынап, облыс бойынша жалпы командалық есепте жеңімпаз атанды. Осылайша, биыл үшінші рет қатарынан ауданның спортшылары жеңіс тұғырынан көрінді. Бұл – мықты мектептің, қажымас еңбектің, бапкерлердің табандылығының нәтижесі. Әрбір жеңістің артында талай сағаттық жаттығу, төгілген маңдай тер, сенім мен үміт жатыр.

Аудан әкімі Айтбай Насриддинұлы да спортшылардың жеңісін елдік жетістік деп бағалап, арнайы қабылдау өткізді. Қызмет кестесінің тығыздығына қарамастан, спортшыларға құрмет көрсету – бұл жергілікті биліктің спортқа деген шынайы жанашырлығының белгісі. Әкімнің жүрекжарды құттықтауы мен ізгі тілегі спортшыларға жаңа серпін берері анық.

Сондай-ақ кездесуге қатысқан ардагерлер мен спорт жанашырлары да жастардың жеңісіне қуанып, спорттың дамуына тілеулестік білдірді.

Жеңіс – жай ғана медаль мен кубок емес. Жеңіс – ауылдағы әрбір жас баланың арманына дем беретін, жастарды спортқа жетелейтін ұлы күш. Шиелі спортшыларының табысы – ертеңгі чемпиондардың алғашқы баспалдағы.

Алда жаңа биіктер, жаңа белестер күтіп тұр. Спортшылардың бүгінгі табысы – ертеңгі ұрпаққа бағдар, аудан халқы үшін мақтаныш. «Алтын күз – 2025» – Шиелінің спорт тарихында тағы бір жарқын бет болып жазылды. Бұл жеңіс – елдің сенімін ақтаған еңбектің, төгілген тердің, берік бірліктің жемісі.