Аудан әкімі Айтбай Жандарбеков облыстық спартакиадасында жеңімпаз аудан спортшыларын қабылдап, арнайы құрмет көрсетіп, жеңістерімен құттықтады. Өткен аптада Сырдария ауданында ауыл спортшыларының ХХХVІІ (37) «Алтын күз – 2024» облыстық спартакиадасы өткен болатын. Спорттың 16 түрін қамтыған байрақты бәсекеде барлық аудандардың құрама командасы қатысып, дүбірлі додада өзара бақ сынасты.  Спартакиада қорытындысы бойынша Шиелі ауданы құрама командасы бірінші орынды иеленіп, жеңімпаз атанды. Сондай-ақ, 2024 жыл басынан аудан спортшылары республикалық жарыстармен Қазақстан Республикасының чемпионатында 14 алтын, 21 күміс, 41 қола иеленді. Әлем біріншілігінде 1 қола, азия біріншілігінде 1 күміс олжалады. Кездесуге аудан ардагерлері қатысып, аудан спортшыларын және жаттықтырушыларын жеңістерімен құттықтап, сәттілік тіледі.