Биыл Атырау облысы әкімінің білім гранты 153 түлекке берілді. Оның ішінде медицина саласын таңдаған 84 жас бар. Облыс әкімінің орынбасары Жасұлан Бисембиевтің айтуынша, 2017 жылдан бері мектеп түлектеріне әкім гранты беріліп келеді. Білім гранты жергілікті бюджет есебінен қаржыландырылады. «Қазір әкім грантымен атыраулық 357 студент еліміздегі медициналық жоғары оқу орындарында білім алып жүр.  Биыл алғашқы 25 жас жоғары оқу орнын бітіреді. Олар білімін резидентурада жалғастырмайтын болса, өңірге оралады. Грант иелеріне қойылатын негізгі талап – оқу орнын аяқтағаннан кейін өңірдегі мемлекеттік мекемелерде кемінде 3 жыл жұмыс істеу», дейді Жасұлан Бисембиев.

Оның айтуына қарағанда, облыс әкімінің грантын берудің өзіндік тәртібі бар. Біріншіден, бұл мемлекеттік білім грантын иелене алмаған талапкерлерге арналған. Екіншіден, әкім грантын алу үшін өткізілетін конкурсқа мектеп және колледж түлектері қатысты. Үшіншіден, әкім гранты кадр тапшылығына байланыс­ты сұраныс негізінде бөлінеді. Басты талап – мамыр-маусым айларындағы Ұлттық бірыңғай тестілеу қорытындысымен ережеге сәйкес құжаттарды тапсыру. Облыстық білім басқарма­сының баспасөз қызметі мәлім еткендей, әкім грантымен оқыған студенттер жоғары оқу орнын бітіргеннен кейін жауапты мекеменің берген жолдамасымен жұмысқа орналаса алады. Ал биыл білім грантын бөлу кезінде медицина, педагогика, ауыл шаруашылығы, ветеринария, орман ресурстары және орман шаруашылығы, дінтану, туризм бағытындағы мамандықтарға басымдық беріліп отыр. Мәселен, педагогика, бейнелеу өнері, көркем еңбек, музыкалық білім, ветеринария, дене шынықтыру, спорт, туризм және сервистік қызмет мамандығының грантын иеленгендерге Х.Досмұхамедов атындағы Атырау универ­ситетінде оқуына жол ашылды. Әкім грантының басым бөлігі адам жанына арашашы болатын медицина саласының маман­дарын даярлауға бөлінді. Енді атыраулық 84 түлек Астана, Ал­маты, Қарағанды, Ақтөбе қала­ла­рындағы медицина уни­вер­ситетінде жалпы медицина ма­ман­дығымен жоғары білім алады. Ал дінтану, теология маман­дығы үшін берілген грант иелері Нұр-Мүбарак Египет Ислам мәдениеті университетінің студенті атанды.

 

Атырау облысы