Полиция әлеуметтік желіде тараған бейнежазбадағы көпірден секіріп кеткен адамды анықтады.

Әлеуметтік желілерге мониторинг жүргізу кезінде Түркістан облысының полицейлері жас жігіттің досымен бәстесіп, көпірден секіріп кеткен бейнежазбасын анықтады.
Оқиға 1 сәуірге қараған түні Сайрам ауданы Ақсукент маңындағы Ақсу өзенінде болған. Сайрам АПБ-ның қызметкерлері жастардың кім екенін анықтады.
Жігіттердің бірі видеоға түсірсе, екіншісі көпірден секірген. Олардың ауыл тұрғындары екені белгілі болды. Екі жігіт видеоны ақша алу үшін емес, әзіл үшін, содан кейін Tik Tok желісіне орналастыру мақсатында түсіргенін айтты.
Суға секірген жігіт жарақаттанбаған және оның денсаулығына ешқандай қауіп төнбеген. Олар істеріне өкінетінін айтып, бұдан былай мұндай асығыс, әрі өмірге қауіп төндіретін әрекеттерді жасамауға уәде берді.
Сондай-ақ тәртіп сақшылары оларға профилактикалық түсіндірме шараларын жүргізді.