Өскен өңір Osken-onir.kz ақпараттық агенттігі
» » Аттестат алып қолына, аттанды түлек үлкен өмір жолына

Аттестат алып қолына, аттанды түлек үлкен өмір жолына

Бейсенбі күні Шиелі ауданындағы барлық мектептерде аттестат тапсыру рәсімі өтті. Ал сол мектептердің ішінде «№46 А.С.Пушкин атындағы мектеп-лицейі» түлектерінің қуанышы ерекше болды. Себебі аталған мектептегі салтанатты шараға аудан әкімі Нариман Мақұлбеков қатысып, түлектерге өз қолымен аттестат тапсырды.Биыл мектеп-лицейді 71 түлек бітірсе, соның 4-еуі «Алтын белгі», 4-еуі «Үздік аттестат» иегері атанған. Осы жетістіктерді тілге тиек еткен аудан әкімі Нариман Әскербекұлы түлектерді үлкен өмірге қадам басуымен құттықтап, ерік-жігер, еңбекқорлық, адалдық секілді қасиеттерді серік етуге шақырды. «Осы түлектер бірнеше жылдан кейін білікті маман атанып, Шиелі ауданының өсіп-өркендеуіне өз үлесін қосады» деген сенімін білдірді. Ал келесі сөз кезегін алған «Шиелі кенті ардагерлер кеңесінің төрағасы» Болат Күлімбетов болса, түлектерге сәттілік тілеп, әрі бүкіл мектеп ұжымы мен оқуышылары үшін қуанышты жаңалықты жеткізді.
– Әбден ескірген мектеп ғимаратының ­орнына қаражат мәселесі тездетіп шешілсе 2023 жылы, шешілмеген жағдайда 2024 жылы жаңа мектеп ғимараты бой көтермек.
Жалпы алғанда аудандағы білім мекемелері оқушылары мен түлектерінің жеткен жетістіктері аз емес. Мәселен, биыл аудан бойынша мектепті 936 түлек бітірсе, 781 бала Ұлттық біріңғай тестілеу тапсыруға өтініш білдірген. Оның ішінде 32 түлек «Алтын белгі», 96 түлек «Үздік аттес­тат» игері атанған. Ал аудан бойынша 130 балл ең жоғарғы көрсеткішіне «№127 Ш.Уәлиханов атындағы мектеп-лицейдің» оқушысы қол жеткізген. Ал жетістікке жеткен балалар қатарына IV республикалық Абайтану олимпиадасының I орын иегері Рәбибі Орманбекованы, республикалық байқаулардың жүлделі орын иегері ­Диана ­Баймырзаеваны, балалар киносының республикалық фестивалінің жүлделі орын иегері Хасана Мейрамбекті, халықаралық «Абай – дана, Абай – дара қазақта» шығармашылық байқауының I орын иегері Жәния Әлібаеваны, республикалық үстел теннисі жарыстарының жүлдегері Сәкен Абдулланы жатқызуға болады.

Рамазан ӘНӘПИЯ
18 маусым 2022 ж. 513 0