Пошта байланыс торабында тың жаңалықтар мен жүйелі қызмет түрлері іске асып келеді.
– Шиелі ауданында «Әмбебап Агент» пилоттық жобасы іске қосылуда. Жобаның мақсаты – «Қазпошта» ұлттық почта операторының көмегімен елді мекендерде «Азаматтарға арналған үкімет» порталының қызметтерін, өзге де онлайн қызметтерді қолжетімді ету, – дейді Шиелі аудандық пошта байланыс торабының бастығы А.Бимағанбетов сәрсенбі күні өткен брифинг барысында.

Сондай-ақ, жаңа қызметтер қатарында «Е-өтініш» ақпараттық жүйесі ұсынатын қызметтерді, яғни мемлекеттік органдар тарапына жазылатын арыз-шағымдарды, өтініштерді ауылдық жерлердегі пошта бөлімшелері арқылы ұсыну мүмкіндігі де бар.

Оның айтуынша, алдымен ауылдық жердегі пош­та қызметкерлерін арнайы оқу курсынан өткізіп, тест қабылдау жоспарланған. Бұл жұмыстарды 14-ші маусымнан бастап «Халыққа қызмет көрсету орталығының» мамандары мен аудандық әлеуметтік бағдарламалар бөлімінің қызметкерлері жүргізуде. Оқу курстары аяқталып, тестілеуден өткен қызметкерлер белгілі болса, пилоттық жоба 1-ші шілдеден бастап еліміздің барлық аймақтарында іске қосылуы тиіс. Жоба өзектілігін көрсеткен жағдайда, пошта бөлімшелеріндегі қызметкерлер саны да артуы мүмкін.