Елбасы Нұрсұлтан Назарбаев «Біз Тәуелсіздікке аңсап, зарығып жеттік. Енді сол тәуелсіздіктің қасиетті рәміздерін де ерекше қадірлеуіміз, қастерлеуіміз керек. Әрбір азамат Қазақстанның Туын, Елтаңбасын, Әнұранын тұмардай қасиет тұтуы қажет. Елдігіміздің сыналатын бір тұсы – осы», – деген болатын. Мемлекеттік рәміздер қай елдің болса да ең басты қасиетті құндылығы, мемлекеттің мызғымас тірегі. Осыған орай, Рәміздер алаңында аудан әкімі Қамбарбек Мүбараковтың қатысуымен 4 маусым – Қазақстан Республикасы Мемлекеттік Рәміздер күніне арналған «Ел рәміздері – еркіндік нышаны» атты мәдени іс-шара болып өтті. Аталған шараға аудандық мәслихат хатшысы Т.Жағыпбаров, «Nur Otan» партиясы Шиелі аудандық филиалы төрағасының бірінші орынбасары Б.Сыздық пен ауданның зиялы қауым өкілдері және ардагерлері қатысты.
Осыдан 29 жыл бұрын, яғни 1992 жылдың 4 маусымында мемлекеттік рәміздер қабылданды. Содан бері еліміз үшін тарихи күн саналып, алтын әріппен санамызда жазылып, рухымызды күшейттіп келеді. Бұл күн Көк байрақтың, Елтаңбаның, Әнұранның туған күні. Сондай-ақ, өзгеге елдігімізді танытатын, тәуелсіз мемлекет екенімізді білдіретін бірден бір даралықтың белгісі. Тұғырым – Көк байрақ, Әнұран – мол қайрат, Елтаңбам – жұртқа айбат дейтұғын қасиетті ұғымдар әрбір азаматтың бойын­да сақталып, санасында жатталып тұруға тиіс.

Өскелең ұрпақтың патриоттық сезімін ояту, ұлттық намыс пен отансүйгіштікті қалыптастыру мақсатында ұйымдастырылған «Ел Рәміздері – еркіндік нышаны» атты іс-шараның шымылдығы Әнұранмен түрілді.

Қасиетті рәміздер қашанда қастерлі деген аудан әкімі Қ.Мүбараков халықты мерекемен құттықтап, мейрамның ел жүрегінен ерекше орын алғанын атап өтті.

– Құрметті шиеліліктер, бүгін біз елдігіміздің басты нышаны саналатын мемлекеттік рәміздер күнін атап өтудеміз. Бұл тәуелсіз еліміз үшін атаулы күндердің бірі саналады. Ұлттық рәміздер кез келген мемлекеттің мызғымас белгілерінің бірі. Еліміздің әрбір азаматы мемлекеттік рәміздерді құрметтеп, қастерлеуі қажет. Өйткені, бұл тек елдігіміздің белгісі ғана емес, халқымыздың тәуелсіздік туралы арманының орындалу белгісі. Сондықтан, біз үшін айтулы мерекенің маңызы зор, – деді Қамбарбек Мүбараков.

Одан соң мерекені тамашалауға келген шиеліліктерге ұлттық рәміздер туралы тың ақпараттар айтылып, жас мемлекеттік қызметкерлердің ант қабылдауымен жалғасын тапты. Аудан әкімі аппаратының ұйымдастыру және инспекторлық жұмысы бөлімінің бас маманы Е.Әбдешов, Телікөл ауылдық округі әкімі аппаратының бас маманы К.Мұсаев, аудандық полиция бөлімінің қызметкерлері Д.Мұхамедәлі, Т.Абраманов сынды бірқатар азаматтар мемлекеттік қызметкер болудың жауапкершілігі мол екенін тілге тиек ете отырып, адал қызмет етуге ант берді.

Бұдан кейін сөз алған құттықтаушылар рәміздерді қастерлеу, оны болашақ ұрпаққа аманат етіп тапсыру – бүгінгі әрбір азаматтың басты парызы, отанға деген шынайы құрметтің көрсеткіші екендігін айта өтті. Одан әрі «Арман» мәдениет үйінің өнерпаздары әннен шашу шашты.