Қазақстанның Еңбек Ері, халық жазушысы Әбіш Кекілбаевты білмейтін қазақ кем де кем болар. Әбіш ақсақал бір сөзінде «Дін ұстай алсаң – қасиетің, ұстай алмасаң –қасіретің» деген екен. Иә, кемеңгер жазушы бұл сөзі арқылы адамдардың дін ұстанудан бұрын зор жауапкершілікті мойнына алғанын сезініп, Құдайға берген сертіне адал, сеніміне сенімді болу керектігін меңзесе керек. Кеше аудан әкімдігінде діни бірлестіктермен байланыстар жөнінде кеңес отырысы өтті. Аудан әкімінің орынбасары А.Есмахановтың төрағалығымен өткен кеңес отырысында күн тәртібінде тұрған төрт мәселе көтеріліп, сала мамандары баяндама оқыды.Аудандық ішкі саясат бөлімінің басшысы Ж.Баймұратова баяндамасының «Осы жылы еліміздің дінаралық толеранттылық пен конфессиялардың ынтымағын арттырудағы саясаты жоғары деңгейде жүзеге асырылуы нәтижесінде ауданымызда діни негізде бас көтерулер мен келеңсіз оқиғалар орын алған жоқ» деп бастады. Бұдан бөлек, бөлім басшысы биыл аудан тұрғындарының діни экстремизм мен терроризмге қарсы сауаттылығын арттыру мақсатында жұмыс жоспары құрылғанын, оған қатысты ақпараттық-түсіндіру тобын аудан әкімдігі бекіткендігін сөз етті. Ж.Орынбайқызы орайы келгенде аудандағы әлеуметтік жобалар бойынша соңғы төрт жылда бюджеттен қанша қаражат бөлініп, оның қайда жұмсалғанына тоқталды. Мәселен, 2018 жылы діни экстремизм профилактикасы бағытында әлеуметтік жобаға қаржы бөлініп, оны «Береке – жастар» қоғамдық бірлестігі іске асырған. 2019 жылы «Сұңқар» қоғамдық қоры жеңімпаз атанып, техникалық ерекшеліктеріне байланысты тиісті жұмыстарды атқарған. Ал өткен жылы жоба бо­йын­­­ша «Қызылорда облысының жас­тар Одақтары» қоғамдық бірлестігі жеңімпаз атанып, техникалық ерекшеліктеріне сәйкес жоспарлы іс-шаралардың өткізілмеуі негізге алынып келісім шарт бір жақты бұзылған. Осылайша бөлінген қаржы бюджетке толық қайтарылған.
Кеңес отырысында соңғы уақытта қоғамда жиі талқыланып, көпшіліктің наразылығын тудырып жүрген «Жәрімбет ата» қайырымдылық қоры жайлы да аз-кем сөз болды. Қызылорда қаласындағы «Қожа Ахмет Яссауи» қайырымдылық мекемесі, өңірімізде «Жәрімбет ата» қайырымдылық қорын тіркеп, «Жәрімбет ата» қайырымдылық мекемесінің бұйрығы негізінде әрекет етуде. Аудан орталығында орналасқан сауда орындарында, жанармай бекеттерінде, «Пансионат ашамыз, бала оқытамыз» деген мақсатта екенін айтып арнайы жәшіктер орналастырған. Қайта құрылымдау жұмыстары барысында ғимараттың яғни бұрынғы тойхана залының шамамен 1.5 метр тереңдікте төменге қарай қазылғанын байқап, қайта құрылымдау жұмыстарының заңдылығын тексеру мақсатында ауданы әкімінің орынбасары тарапынан, Қызылорда облысының мемлекеттік сәулет-құрылыс бақылауы басқармасына ұсыныс хат жолданған.
Қайырымдылық демекші, жиында кент орталығындағы қайырымдылық жәшіктерінің мәселесі де май шаммен қаралды. Қазір кенттегі кез келген дүкенге кірсеңіз атаулары бөлек болғанымен мақсаттары бір қайырымдылық жәшіктерін көресіз. Тіпті, бір сауда орталығынан осындай бірнеше жәшікті байқауға болады. Соның салдарынан ұшы-қиыры жоқ, жиналған қаражатты кімнің қалтасына түсіп жатқаны белгісіз жәшіктер көбейген. Осы ретте кеңеске қатысушылар бұлай халықты алаңдатпай қайыр-садақаны бір жерге жинауды ұсынды.
Осыған сәйкес, аудандық кәсіпкерлік, өнеркәсіп және туризм бөлімінің басшысы А.Есімов баяндама жасап, онда бөлім тарапынан, тиісті құзырлы мекемелермен бірлесіп, аудан бойынша күмәнді қайырымдылық жәшіктер қойылған кәсіпкерлік нысандарға түсіндірме жұмыстары жүріп жатқаны айтылды. Сондай-ақ, кәсіпкерлерден күмәнді қайырымдылық ұйымдары жәшіктерін қою жөнінде өтініш білдірген жағдайда бөлімге хабарласып ескерту керектігі айтылды.