Бүгін аудан әкімі Қ.Мүбараков көктемгі су тасқынының алдын алу мақсатында Сырдария өзенінің бойындағы қауіпті учаскелерді аралады.Айта кету керек, Сырдария өзені бойында жалпы ұзындығы 71,6 шақырым қорғаныс бөгеттері бар, оның ішінде: 63,3 шақырымы оң жағалауда, 8,3 шақырымы сол жағалауда. Аудан бойынша Сырдария өзені бойындағы 5 қауіпті учаскесі бар. Олар: Шиелі каналының бас сағасы, «Ақ қала», «Ақтам-Мешеуіл», «Жөлек», «Жеңішкекөл» қорғаныс бөгеттері. Төтенше жағдайлардың алдын алуға байланысты аудандық азаматтық қорғаудың 14 қызметі, құрамында 54 техника, 169 адамы бар. Шиелі ауданы бойынша төтенше жағдайларға байланысты халықты эвакуациялау үшін 16 жинақтау, 22 қабылдау пункттері белгіленген. Өңір басшысы Қ.Амангелдіұлы қауіпті учаскелерді аралау барысында Сырдария өзенінің деңгейін қатаң бақылауға алып, аудандағы қауіпті учаскелеріндегі қорғаныс бөгеттерін тексеріп отыруды және көктемгі су тасқынының алдын алу мақсатында тиісті сала басшыларына нақты тапсырмалар берді.