Облыстық "Жастар күні" байқауы аудан өнерпаздарының қатысуымен өткен «Жастар ел ертеңі – ұлт болашағы» атты гала-концертпен қорытындыланды. Концерт Алаш арыстарының жастарға айтқан өнегелі өсиетімен басталды. Оны аудандық мәдениет үйінің өнерпаздары сахналады. Содан кейін сырнаймен саз төккен саңлақ Нартай Бекежановтың бүгінгі ізбасарлары өз өнерлерін ортаға салды. Бұдан бөлек Әлшекейдің күйі «Терісқақпайды» төгілте орындаған «Сырлы саз» ансамблі тыңдарманды тәнті етті. Сондай-ақ «Классик» квартеті, гитара шерткен Сафуан Көрегенов, Ә.Тәжібаетың жыр шумағын оқыған Абай Нұрсұлтан, заманауи би билеген «Ай-шер» би тобы, мың бұралып өнер көрсеткен Мөлдір Башарова, бірнеше әнді нақышына келтіре орындаған «Қасықшылар» ансамблі кеш қонақтарының қошеметіне бөленді. Осылайша аудан жастарының өнерін облысқа көрсетуге ұйытқы болған шара өз мәресіне жетті.

"Өскен өңір" ақпарат