Шиелі ауданының жастары күнінде «Тігін өнеркәсібінің профессоры» атағының иегері Тоғжан Мұсаеваның коллекциясы көрсетілді. Оған 2013 жылы қазақ аруының тәжін киген Әйгерім Қанатбаева қолдау білдірді. Сәні мен сымбаты келіскен қыздар үкілі кәмшат пен бүрмелі көйлектің шырайын аша түсті. «Тоғжан» тігін шеберханасында дайындалған киімдеріндегі ою-өрнектер, қолданылған материалдар композициясы, олардың арасындағы керемет үйлесім, түр-түстің өзара сәйкестігі көрерменді сүйсінтті. Сәйкесінше осы туындылар Тоғжан Барлыбайқызының шеберлігін, шалқар шабытын, ұлттық табиғатты терең меңгергенін байқатты.