«ҮШ ҰРПАҚ – ОРТАҚ МҰРАТ»: ТОҒЫЗҚҰМАЛАҚТАН САЙЫС ӨТТІ

Аталған шараның басты мақсаты аға буын өкілдеріне құрмет көрсету, олардың өнегелі өмір жолын жас ұрпаққа үлгі ету, ұрпақтар арасындағы байланысты нығайту және ұлттық құндылықтарды кеңінен насихаттау. Қазақ халқының дәстүрлі зияткерлік ойыны саналатын тоғызқұмалақ – ұрпақтан-ұрпаққа жалғасып келе жатқан ұлттық мұра. Ойын адамның ойлау қабілетін, есептеу шеберлігін, сабырлылығы мен стратегиялық ойлау дағдысын дамытады. Сондықтан мұндай жарыстардың өскелең ұрпақ үшін тәрбиелік маңызы зор.

Сайыстың ашылу салтанатында «Әділет» партиясы Шиелі аудандық филиалының төрағасы Жібек Баймұратова сөз сөйлеп, барша қатысушыларды Халықаралық қарттар күнімен құттықтады.

– Қарттар күні үлкенге құрмет көрсетіп, олардың өмір жолына тағзым ететін ерекше күн. Аға буынның көргені мен түйгені, ел дамуына қосқан үлесі кейінгі ұрпаққа әрдайым үлгі. Ал ұлттық ойындар – халқымыздың мәдени мұрасының ажырамас бөлігі. Бүгінгі шара арқылы біз ұрпақтар сабақтастығын дәріптеп, жастарды ұлттық құндылықтарды қадірлеуге үндеп отырмыз, – деді Жібек Баймұратова.

Жарыс барысында қатысушылар тоғызқұмалақ ойынының қыр-сырын меңгеріп, өзара бақ сынасты. Әр ойыншы өз білімін, есептеу қабілетін және тактикалық шеберлігін көрсетуге тырысты. Ойын үстінде қатысушылар арасында өзара тәжірибе алмасу, пікір бөлісу және үлкендерден жас буынға ақыл-кеңес беру сәттері де орын алды. Шараның ерекшелігі оның тек спорттық жарыс ретінде ғана емес, ұрпақтар арасындағы рухани байланысты нығайтатын тәрбиелік мәні бар басқосу ретінде ұйымдастырылуында. Аға буын өкілдері жастарға ұлттық ойындардың тарихы мен маңызы туралы айтып, тоғызқұмалақ ойынының ерекшеліктерімен бөлісті.

«Үш ұрпақ – Ортақ мұрат» тұжырымдамасы аясындағы мұндай шаралар қоғамдағы сабақтастықты сақтауға, үлкенді сыйлау мен кішіге қамқор болу дәстүрін дәріптеуге бағытталған. Үлкендердің өмірлік тәжірибесі мен жастардың жаңа көзқарасын тоғыстыру арқылы ортақ құндылықтарды қалыптастыру – бүгінгі қоғам үшін маңызды міндеттердің бірі.

Тоғызқұмалақтан өткен сайыс барысында қатысушылар белсенділік танытып, ұлттық ойынға деген қызығушылықтарын көрсетті. Жарыс соңында үздік нәтиже көрсеткен қатысушылар анықталып, оларға марапаттар мен алғыс білдірілді.