Жастар – елдің ертеңі, ал ұлттық спорт – ұлт рухының тірегі. Осындай асыл ұғымдарды біріктірген дүбірлі дода Шиелі жерінде өз шымылдығын түрді. Халықаралық жастар күніне орай ұйымдастырылған Бала би баба атындағы қазақ күресінен XIV республикалық турнир биыл да үлкен деңгейде өтті. Бозкілемде белдескен жас балуандар – тек мықтыны анықтап жатқан жоқ, ата-баба аманаты болған төл өнерімізді дәріптеп, ел рухын асқақтатып тұрды. 

Шара кенттегі дене-шынықтыру-сауықтыру кешенінде өтті. Аталған турнирге 2010-2011 жылы туған жасөспірімдер қатысып, 10 салмақ дәрежесі бойынша өзара мықтыны анықтады. Айтулы бәсекеге Қазақстанның 11 облысынан бөлек, Қырғызстан, Өзбекстан және Тәжікстан мемлекеттерінен жас спортшылар келіп, халықаралық деңгейде тартысты белдесулер өрбіді. Турнирдің салтанатты ашылуында аудан әкімі Айтбай Жандарбеков құттықтау сөз сөйлеп, жас спортшыларға сәттілік тіледі. Өз сөзінде ол бұл доданың тек жарыс емес, ұлттық болмысымызды дәріптейтін маңызды рухани-спорттық оқиға екенін атап өтті. Сонымен қатар Құрмет орденінің иегері, Жамбыл облысының Құрметті азаматы Марат Жақыт пен жарыстың бас демеушісі, Шиелі ауданының Құрметті азаматы Темірхан Әлімқұлов та жас балуандарға жүрекжарды тілектерін арнап, спортшыларға жігер берді. Шара барысында ерекше бір марапаттау рәсімі де ұйымдастырылды. Тәжікстан қазақ күресі федерациясының президенті Далер Ниёзов ұлттық спорттың халықаралық деңгейде дамуына қосқан елеулі үлесі үшін Темірхан Әлімқұлов пен Ғабит Тажбановты федерацияның арнайы медалімен марапаттады. Бұл – қазақ күресінің тек ел ішінде емес, шекара асып беделінің артып келе жатқанын айғақтайды. Жыл сайын дәстүрлі түрде өтетін бұл турнир – бозкілемдегі бағын сынап, болашағын спортпен байланыстырғысы келетін жас ұрпақ үшін зор мүмкіндік. Дүбірлі дода – тек күш сынасу емес, ұлттық тәрбиені бойға сіңіретін, батыр бабалар рухын сезіндіретін аламан. Бүгінгі бозкілемдегі белдесу – ертеңгі ел қорғайтын ерлердің шыңдалу сәті. Осындай тартысты додалар арқылы жас буын тек дене шынықтырып қана қоймай, өз бойына табандылық, тәртіп, намыс пен отансүйгіштік қасиеттерді қалыптастырады. Олай болса, күш пен рух, намыс пен мәрттік сыналған бұл жарыста жеңіс тұғырынан көрінген әр палуан – ел спортының ертеңі. Ал Шиелі төрінде болған бұл турнир – сол ертеңнің берік іргетасы!