Мемлекет басшысы Қасым­Жомарт Тоқаев Мемлекет басшысы Қасым­Жомарт Тоқаев «Ұлағатты ұрпақ тәрбиелеу – аса жауапты әрі күрделі міндет. Ұлттық құндылыққа қанығып өскен өреннің танымы терең, ділі берік болады» деген болатын.

Осы орайда өткен жұма күні Ә.Тәжібаев ауылында «Ақбесік» бөбекжай балабақшасында «Ұрпақ ұлттық ойынмен шыңдалады» атты спорттық сайыс өтті. Шара өскелең ұрпаққа ұлттық ойындарды үйретіп, бойына сіңіру мақсатында ұйымдастырылған.

Дәстүрлі түрде өтетін шараның шымылдығын балабақша меңгерушісі Жанар Әлиакбарова ашып, бүлдіршіндерге ұлттық құндылықтары жоғары ойындардың маңызды екенін айтты. Сайысты ұйымдастырушы Бағила Қалеке, Гүлсан Ділдәбайқызы және көмекші тәрбиешілер Марал Әбдіқалықова, Мейрамкүл Сәтбаевалар ойынның шарттарын түсіндіріп, жарысты бастады.

Екі топ арасында өткен ойын төрт кезеңнен тұрады. Алғашқы кезең «Ат жарыс» болса, одан кейін «Асық ату» ойыны, «Кім жылдам?» және «Жас балуан» кезеңінде балалар қазақша күрес ұлттық спорттық сайысы бойынша бақ сынады. Қызыққа толы тартысты ойынды тамашалаған ата­аналар тәрбиеші апайларға өз алғыстарын білдірді.

«Салауатты өмір салты өздігінен жасалмайды, оған жүйелі түрде тәрбиелеу керек. Ұлттық ойын баланың ақыл­ойын дамытуға, батыл әрі епті болып өсуіне тәрбиелейді», – дейді ұйымдастырушы Бағила Қалеке.

Иә, ұлттық ойын арқылы балалар қазақ халқының дәстүрі мен тәрбиесіне қанық болып өседі. Бойында елге деген жанашырлық сезім пайда болады. Қазақ халқының ұлы ойшылы А.Құнанбаев: «Ойын ойнап ән салмай, өсер бала болама?» деп айтқандай, қазіргі күннен бастап құндылығы жоғары ойынға баулу үлкен жеңіспен пара­пар.