ЖАСТАРҒА ЖОЛ АШҚАН МҮМКІНДІК

Жастар – мемлекеттің ең бас­ты капиталы, елдің ертеңгі тірегі. Бүгінде мыңдаған жас мектеп, колледж және жоғары оқу орындарын тәмамдап, үлкен өмірге қадам басуда. Олар алған білімін тәжірибемен ұштастырып, қоғамның дамуына өз үлесін қосуды мақсат етеді. Осы орайда жас мамандарды қолдау және олардың еңбек нарығына бейімделуіне жағдай жасау – мемлекет саясатының маңызды бағыттарының бірі.
Жоғары оқу орнын немесе колледжді жаңа бітірген түлектердің алдында көбіне тәжірибе жинақтау мәселесі тұрады. Көптеген жұмыс берушілер тәжірибесі бар мамандарға басымдық береді. Осыған байланысты мемлекет тарапынан жастарды жұмыспен қамтуға бағытталған түрлі бағдарламалар жүзеге асырылып келеді.

Солардың бірі – «Жастар тәжірибесі» бағдарламасы. Бұл бағдарлама оқу орнын аяқтаған жас мамандардың алғашқы еңбек тәжірибесін жинақтауына мүмкіндік береді. Бағдарлама арқылы жастар өз мамандығы ­бойынша жұмыс істеп, кәсіби біліктілігін арттырады әрі еңбек нарығына бейімделеді. Ең бастысы – жас маман тәжірибе жинап қана қоймай, өзінің қабілетін көрсетіп, тұрақты жұмысқа орналасуға жол ашады.

Бүгінде көптеген жастар аталған бағдарлама арқылы еңбек жолын бастап, өз саласының білікті маманына айналып келеді. Бұл – жас­тарды қолдаудың және олардың болашағына инвестиция салудың нақты көрінісі.

Сонымен қатар қазіргі еңбек нарығы жастардан тек дипломды ғана емес, заман талабына сай білім мен дағдыны талап етеді. Цифрлық технологияларды меңгеру, шет тілдерін білу, кәсіби біліктілікті үздіксіз жетілдіру – табысты мансаптың басты шарттарының бірі. Сондықтан жастар да өз мүмкіндігін арттыру үшін үнемі ізденіп, білімін толықтырып отыруы қажет.

Еңбек нарығында жұмысшы мамандықтарына да сұраныс жоғары. Қазіргі таңда техникалық және кәсіптік білім алған жастар үшін де көптеген мүмкіндіктер қарастырылған. Сондықтан мамандық таңдауда еңбек нарығының сұранысын ескеру маңызды.

Мемлекет жастардың жұмыспен қамтылуына ерекше көңіл бөліп келеді. «Жастар тәжірибесі», алғашқы жұмыс орны, қоғамдық жұмыстар және басқа да мемлекеттік бағдарламалар жастардың еңбек жолын бастауына қолдау көрсетуде. Бұл бастамалар жас мамандардың өз кәсібін игеріп, тұрақты жұмысқа орналасуына мүмкіндік береді.

Жастардың табысты болуы – елдің табысты болуының кепілі. Сондықтан олардың білім алып қана қоймай, алған білімін іс жүзінде қолдануына жағдай жасау – ортақ міндет. Бүгінгі күні еңбек етемін деген жасқа мүмкіндік мол. Ең бастысы – сол мүмкіндікті тиімді пайдаланып, өз кәсібінің білікті маманы болуға ұмтылу.