Кей адамдардың өмір жолы – тұтас бір еңбек шежіресі іспетті. Уақытпен бірге шыңдалып, маңдай термен өрілген мұндай ғұмырлар қоғам үшін қашанда қадірлі. Сондай жанның бірі – есеп-қисаптың қыр-сырын жетік меңгерген, тәжірибелі бас есепші Шарипа Қайырбекқызы.
Шиелі ауданында дүниеге келген ­Шарипа Мәдиева жастайынан еңбек пен жауапкершілікті өмірлік қағидасына айналдырды. Уақыт өте келе сол қасиеттер оның бүкіл ғұмырының өзегіне айналып, кәсіби жолының айқын бағытын қалыптастырды.

Жылдар жылжып, уақыт алға озған сайын оның еңбек жолы да кемелдене түсті. Жалпы еңбек өтілі 46 жылға жеткен білікті маман – өз ісінің шынайы шебері. Алғашқы еңбек жолын жылжымалы механикаландырылған ­колоннада бастап, құрылыс саласындағы мекемелерде қызмет атқарған ол сол кезеңдерде тәжірибе жинап, кәсіби тұрғыда шыңдала білді. Қай салада еңбек етсе де, жауапкершілік пен тиянақтылықты басты қағида етіп ұстанды.

Қазіргі таңда ол «Шиелі Тас-Оңтүстік» жауапкершілігі шектеулі серіктестігінде бас есепші қызметін абыроймен атқарып келеді. Осы мекемеде табан аудармай 18 жылдан бері еңбек ету – үлкен сенім мен кәсібиліктің айқын белгісі. Ұжым арасында оның іскерлігі мен ұқыптылығы, есеп-қисаптағы дәлдігі ерекше бағаланады. Әріптестері үшін ол тек білікті маман ғана емес, ақыл-кеңесімен бөлісетін тәжірибелі жан.

Еңбек еленбей қалмайды. Көктемнің көрікті мерекесі – 8 наурыз Халықаралық әйелдер күні қарсаңында облыс әкімі Н.Нәлібаевтың Алғыс хатымен марапатталуы – оның көп жылғы адал еңбегіне көрсетілген зор құрмет.

Алайда адам өмірінің шынайы байлығы тек қызметпен өлшенбейді. Ол үшін ең қымбат қазына – отбасы. Жолдасы Бахтияр Аяповпен бірге шаңырақтың шаттығын арттырып, үш қыз бен бір ұл тәрбиелеп өсірді. Бүгінде сол перзенттерінен тараған 11 немеренің сүйікті ата-әжесіне айналып отыр. Немерелерінің шат күлкісі мен балаларының амандығы – олардың өміріндегі ең үлкен бақыт.

Ғұмыр жолына зер салсаңыз, Шарипа Қайырбекқызының өмірі қарапайымдылық пен еңбектің, жауапкершілік пен адамгершіліктің үйлесімінен құралғандай. Осындай еңбек адамдарының арқасында қоғамның берекесі артып, ұрпаққа үлгі боларлық тағылымды өмір жолдары қалыптасады.