26-шы қарашадағы күн ерекше еді. Түнгі суық әлі қайтпағанымен, таңғы ауада бір өзгеше жылылық бар. Бұл жылылық – табиғаттан емес, сол күні «Арман» мәдениет үйіне ағылған әйелдердің жүрек жылуынан тарап жатқандай көрінді. Олар әсем орамал тағып, өз ісіне сенімді басып ішке енген сайын, ғимараттың іші бір белгісіз қуатқа толып жатқандай сезілді. Мұнда мереке емес, бірақ жүрекке қуаныш сыйлайтын, рухқа серпін беретін «Әйелдер бастамасы – қоғам дамуы» атты аудандық форум өтті. 

Залға кіргенде алдымен көзге түскені бірбірінен мүлде бөлек, алайда тағдыр мен еңбек жіптерімен бір-біріне ұқсап кеткен жүздер. Бірінің қолы – нан илеуге үйренген, екіншісінікі – станок ұстап машықтанған, енді бірінікі – қағаздарға толы кабинеттің тынысын сезінген. Бірақ бәрінің жүрегі – елге қызмет етуді мақсат еткен жүрек. Алдыңғы қатарға жайғасқан аудан әкімі Айтбай Жандарбеков сөзін бастай бергенде, залдағы тыныштық қоюлана түсті. Оның дауысы ресми ғана емес, бір әкелік қамқорлықпен, бір азаматтық салмақпен сөйледі: «Әйелдердің белсенділігі – ауданның дамуының ең сенімді тірегі». Бұл сөз залдағы әр әйелдің жүрегіне жылы тиді. Өйткені әйел үшін ең үлкен сый – оның еңбегін елеп-ескеру, қабілетіне сену. Форум сахнасына көтерілген «Отбасылық зорлық-зомбылық жайлы» тақырыбында Шиелі аудандық ішкі істер бөлімінің бастығының орынбасары Досым Әбуовтың баяндамасы көңілге ауыр тигенімен, аса маңызды еді. Ол отбасылық зорлық-зомбылық туралы деректерді келтірген сайын, бір сәт залды үнсіздік жайлады. Ана мен бала тағдыры, отбасының тағдыры – ешкімге бейжай емес. Форумның ең көркем тұсы – түрлі саланың әйелдері өз тәжірибесін бөліскен сәт. «AMANAT» партиясы Шиелі аудандық филиалының атқарушы хатшысы Жібек Баймұратова сахнаға шыға сала залға ерекше тыныштық орнатты. Оның «Әйел. Өмір. Парасат» деп басталатын сөзі көркем әңгіме секілді өріліп, әйелдің жан дүниесін, рухани әлемін, парасат биігін әсем суреттеп шықты. Сөзі жүрекке жетті, ойға қалдырды. «Семізбай-U» ЖШС «Иіркөл» филиалының жөндеу-қалпына келтіру учаскесінің жұмыстарын есепке алу операторы Ақерке Қабылова, өндіріс саласының нәзік жандыларының бірі, микрофонды қолына алғанда залдың өзі бір сәт зауыттың гүрілін естігендей болды. Ол техниканың тілімен емес, еңбектің тілінде сөйледі. Шиелі индустриалды-аграрлық колледжінің өндірістік оқу шебері Маржан Мәдиева жеңіл өнеркәсіптің болашағын айта келе, қызкеліншектерге батыл қадам жасауға шақырды. Оның сөзі – тігін инесінің жібітпейтін өткірлігімен емес, мейірім мен шабыттың жұмсақтығымен әсер етті. Жеке кәсіпкер, «Ассорти Шиелі» дәмді шұжықтар әлемінің негізін қалаушы Әйгерім Балтабаева сахнаға шыққанда, залда бірден жылы леп сезілді. Жеке кәсіпті жолға қоюдың қиындығын да, тәтті жемісін де көрген жанның сөзі бөлек болады. Оның әңгімесі – табандылық туралы, шынайы еңбек туралы, армандарын тоздырмайтын әйелдер туралы болды. Форум соңында еңбегімен елге үлгі болып жүрген нәзік жандар марапатталды. Әр сыйлық – олардың жылдар бойғы еңбегінің шағын ғана көрінісі, бірақ үлкен еңбектің үлкен бағасы. Залда отырған әр әйел өзінің де еңбегі ескерілгендей сезінді. Өйткені біреудің табысы – бәріне ортақ шабыт. Форум аяқталған сәтте әйелдер сыртқа беттегенде, күн шынымен жылып кеткендей болды. Сыртта әлі қараша, бірақ іштегі көктем сезімі олардың жүзінде тұрды. Олар өз үйлеріне, өз жұмыстарына, өз тіршіліктеріне қайтып бара жатыр. Бірақ бүгінгі кездесуде алған қуат, айтылған ой, берілген батылдық олардың әрқайсысының ертеңін жаңаша бастайтыны анық. Өйткені әйелдің жүрегіне жылу түскен жерде – қоғамға да жылу түседі. Әйелдің ойына от жаққан жерде – қоғамның да шамы жанады. Әйел бастамасы көтерілген жерде – қоғам дамуының жолы кеңиді. Бұл форумның мәні – міне, осында.

Сұлушаш БАХТИЯРҚЫЗЫ