Кеше аудандық мәдениет үйінде мерекеге орай «Би өнері – ізгі өнердің өрнегі» атты аудандық би фестивалі өтті. Салтанатты кешке «Еркеназ», «Азия», «Салтанат», «Еркем-ай», «Дидар», «Наз», «Аяла», «Delice», «Лаула» және №47 мектеп би тобының бишілері қатысып, өз өнерлерін ортаға салды. Сахнаға шыққан әрбір қыздың биге деген ынтасы, қабілеті байқалып тұрды. Әсіресе, «Текемет» биін билеген «Салтанат» би тобы көзге ерекше түсті. Би – тек сахнаның сәні емес, көңілдің әні, достықтың дәні. Міне, бүгінгі шарада әрбір ұжымның өнерге деген адалдығы мен ыстық ықыласы әр қимылынан сезілді. Биік шабыт, төгілген тер, адал еңбек – барлығы сахна төрінен көрінді. Бишілерден бөлек, аудандық мәдениет үйінің өнерпаздарды әннен шашу шашып, көрермендерді бір тамсандырды. Осылайша, би күніне арналған фестивальдің соңы марапаттау рәсімі мен естелік суретпен аяқталды.