Әйел! Мың бір ғажап, жүз бір құбылыс. Әлемнің ең асыл жаратылысы саналатын әйел затының Тәңір тарапынан ерекше сый екенін бүкіл әлем мойындаған. Еуропа да, Азия да, қазақ елінің өзі де әйелге ұлттың қалыбы деп жоғары мәртебе берген. Әйелдің нәзіктігі мен күші бір арнада тоғысып, олар жер бетінде жарық шашып, өмірдің мәнін қалыптастырады. Әсіресе, көктемнің қызғалдақтай құлпырған аруларының ажарына ажар қосатын шуақты мереке де келіп жетті. Егер көктемнің екінші аты болса, ол сөзсіз Әйел-Ана аталар еді. Өйткені адамзатқа әлемнің жарығын сыйлаған аналардың, өмірдің шамшырағы болған қыз-келіншектер мен әпкеқарындастардың орны ерекше.

Қазақтың ұлы ақыны Қадыр Мырза Әли «Төзіміңді берсе сенің темірге, Түгі кетпес темірдің де көмірге» деп әйелдердің төзімділігі мен күшін дәріптесе, Шиелі ауданында да еңбек ерлері арасында шоқтығы биік тұратын Әйел-Аналар бар. Олар даңқты күрішші Ыбырай Жақаевтың шәкірттері, 13 сәбиді дүниеге әкелген «Батыр ана» Ұлбала Алтайбаева, күріш өсірушілер арасында жаңашылдық пен мол өнім жинаудың шебері, «Дала аруы» атанған Заһира Ержанова, ғасырға жуық ғұмыр кешіп, еңбекке өмірін арнаған, трактор айдап, күріш еккен Шырынкүл Қазанбаева, майданға аттанған ерінің орнына қойшының таяғын ұстаған Айша Меңлібаева, алқапта жүріп аяғынан айырылса да, трактор тізгінінен түспеген қаһарман қыз Жадыра Таспанбетова. Бұл әйелдер тек қана еңбек ері болып қана емес, ерлік пен қажырлықтың, махаббат пен ана болудың шынайы үлгісін көрсеткен тұлғалар. Сонымен, 8 наурыз – Халықаралық әйелдер күніне орай аудандық мәдениет үйінде «Әйелмен әлем әдемі» атты мерекелік кеш өтті. Бұл күні мейірімділік, сұлулық, даналық пен нәзіктік салтанат құрды. Ауданның аяулы аналары мен қыз-келіншектері ерекше құрметке бөленді. Айтылған ізгі тілектер мен шырқалған әннің бәрі-бәрі бұл күні асыл ана, адал жар, аяулы апа-қарындастар тақырыбында болды. Мерекелік кештің алғы сөзін аудан әкімі Айтбай Жандарбеков бастап, нәзік жанды әйелдер қауымын шуақты 8 наурыз мерекесімен құттықтап, олардың қоғамға қосқан зор үлесін атап өтті. Түрлі салада адал еңбек еткен ардагерлер мен белсенділік танытқан қыз-келіншектер облыс және аудан әкімінің алғыс хаттарымен марапатталды. Сонсоң арнайы аудан әкімінің ықылас гүлі тарту етілді. Бұл күн тек әйелдерге деген құрмет пен сүйіспеншіліктің белгісі ғана емес, қоғамдағы нәзік жандардың зор еңбегін, қайсарлығын бағалаудың белгісі болды. Әйелдердің қоғамдағы рөлі мен маңызы ешқашан ұмытылмайды. Бұл мереке – көктемнің алғашқы шуақтарымен бірге әйелдерге деген тағзым мен құрмет тұтуды тағы бір рет еске салғандай.