Қазақ халқының тарихына көз жүгіртсек, ауыл әрқашан елдің тірегі, ұлттық болмыстың қайнар көзі болған. Ауыл – мәдениеттің, салт-дәстүрдің, еңбекқорлықтың айнасы. Сол ауылды көркейту, оның әлеуетін арттыру – мемлекет дамуының басты бағыты.
Мемлекет басшысы Қасым-Жомарт Кемелұлы Тоқаев 2025 жылды «Жұмысшы мамандықтар жылы» деп жариялауы арқылы қарапайым еңбек адамдарының мәртебесін көтеруді, жастарды адал еңбекке баулуды басты мақсат ретінде айқындады.

Осы бастаманы қолдаған Шиелі ауданы бүгінде ел ішінде ерекше қызығушылық тудырған «Ауыл күндері» жобасын жүзеге асырып келеді. Бұл тек мерекелік іс-шара емес, ауылдың әлеуметтік, экономикалық және мәдени дамуына тікелей әсер ететін кешенді жоба. Қазіргі таңда бұл бастама әр жұма сайын өткізіліп, аудан халқы асыға күтетін дәстүрге айналды.

«Ауыл күндері» – ауылдағы өмір сапасын жақсарту, тұрғындардың белсенділігін арттыру және олардың өз туған жеріне деген сүйіспеншілігін нығайтуға бағытталған. Бұл жоба арқылы ауылдың мәселелері шешіліп қана қоймай, әр ауылдың өзіндік ерекшелігі таныстырылып, оның мәдени және экономикалық әлеуеті насихатталады.

Кезекті «Ауыл күндері» мерекесі М.Шоқай атындағы орталық алаңда ерекше көңіл-күймен өтті. Бұл жолғы мереке Жуантөбе және Бестам ауылдық округтерінің тұрғындарына арналды.

Қос ауылдың өнерпаздары сахнада өздерінің үздік бағдарламаларын ұсынды. Театрландырылған қойылымдар арқылы ауылдың еңбекқор адамдарының күнделікті өмірі бейнеленді. Ұлттық салт-дәстүрлер жаңаша сипатта көрсетіліп, көрермендерге рухани ләззат сыйлады. Патриоттық әндер мен заманауи билер ауылдың мәдениетінің дамып келе жатқанын дәлелдеді.

Сахнадан берілген әрбір нөмір көрермендерге қуаныш сыйлап қана қоймай, туған ауылына деген мақтаныш сезімін оятты. Әсіресе жастардың белсенділігі ерекше көзге түсті. Олар ауылдың өнерін жоғары деңгейде көрсете отырып, өз замандастарына үлгі бола білді.

Шараға арнайы қатысқан аудандық мәслихат төрағасы Мұрат Тұрабаев ауыл тұрғындарына жылы лебізін білдірді. Ол өз сөзінде бұл жобаның ауыл өміріне қосар үлесі зор екенін атап өтті:

– Ауыл – елдің тірегі, ұлттың жүрегі. Бүгінгі «Ауыл күндері» – тек мерекелік шара емес, ауылдың дамуына бағытталған нақты қадам. Бұл бастама арқылы ауыл тұрғындарының белсенділігі артып, жастардың еңбекке деген қызығушылығы оянады. Әр ауылдың жетістігі – бүкіл ауданның жетістігі, – деді ол.

Оның бұл сөздері жиналған жұрттың көңілінен шығып, оларға үлкен жігер берді.

Қазіргі таңда көптеген жас қалаға кетуді армандайды. Алайда «Ауыл күндері» жобасы олардың көзқарасын өзгертуге бағытталған. Жобада ауылдағы жұмысшы мамандықтарының сұранысы мен маңыздылығы кеңінен түсіндіріледі. Жәрмеңкелерде жергілікті кәсіпкерлер өз өнімдерін ұсынып, жастарға кәсіпкерлік жолында тәжірибе береді. Арнайы шеберлік сабақтары ұйымдастырылып, ауыл жастары жаңа идеяларымен бөліседі. Бұл бастама жастардың ауылда тұрақтап, өз туған жерінің дамуына үлес қосуына жол ашады.

«Ауыл күндері» жобасының ең маңызды нәтижелерінің бірі – ауыл тұрғындарының арасындағы бірліктің артуы. Әр ауыл өз мерекесін жоғары деңгейде өткізу үшін жұмыла әрекет етеді. Үлкендер мен жастар, кәсіпкерлер мен шаруалар – бәрі бір мақсатқа бірігеді.

Бұл өзара сенім мен ынтымақты нығайтып, ортақ жетістіктерге жол ашады. Ауылдың көркеюі тек биліктің ғана емес, әр тұрғынның еңбегіне байланысты екені дәлелденуде.

Киелі өңірде жүзеге асырылып жатқан «Ауыл күндері» жобасы – ауыл өмірін жаңғыртудағы үлкен қадам. Бұл бастама ауылдың әлеуметтікэкономикалық жағдайын жақсартумен қатар, оның рухани дамуына да ерекше үлес қосуда. Мемлекет басшысы жариялаған «Жұмысшы мамандықтар жылы» аясындағы бұл шара еңбек адамдарының мәртебесін көтеріп, жастарды туған жерінде еңбек етуге ынталандырады.

Ауыл гүлденсе – ел де гүлденеді. Ал еңбек пен өнер қатар дамыған жерде болашақтың да іргетасы берік қаланары сөзсіз. Шиеліде басталған осы бастама өзге өңірлерге үлгі болып, ауылдың жаңа дәуірге қадам басуына жол ашып отыр.