Сенбі таңында Шиелі кенті күндегіден ерекше күйге енді. Таң шапағымен бірге тіршілік тынысы жанданып, орталық алаңға ағылған халықтың қарасы көбейді. Бұл күні ауыл мен қала арасы бұрынғыдан да жақындай түсті. Себебі аудан орталығында ауыл шаруашылығы өнімдерінің кезекті жәрмеңкесі өтті.

Жәрмеңке – жай ғана саудасат­тық емес. Ол – ауыл еңбеккерлерінің маңдай тері мен елге деген жанашырлықтың жемісі. Халықтың қамын ойлаған, әлеуметтік бағаны назарда ұстаған бастаманың мәні де, маңызы да зор. Ең бастысы – бұл шара әрбір отбасы үшін тиімді баға, ал еңбек адамдары үшін өз өнімін адал нарыққа шығарудың бірегей мүмкіндігі. Өткен жәрмеңкеде жалпы 9,1 тонна ауыл шаруашылығы өнімі ұсынылды. Бұл сандар – құрғақ статистика емес, әрбір салмақтың артында шынайы еңбек, Жер-Анадан өсіп шыққан берекелі ырзық жатыр. Халықтың сұранысына сай дайындалған өнім түрлері: картоп – 0,4 тонна, жуа – 2 тонна, қырыққабат – 0,1, күріш – 3, қарақұмық – 0,3, макарон өнімдері – 0,5, пісте майы – 0,2, сүт – 0,1, тонна – 1, табиғи бал – 0,4, 0,1 тонна балық өнімдері сатылды. Барлық тауар базар бағасынан 15-20 пайызға төмен бағада сатылды. Бұл – тұрғындар үшін үлкен көмек, әсіресе тұрмысы орташа отбасылар үшін жағымды жеңілдік. Жәрмеңке алаңында тек сауда жасалған жоқ – сол жерде сенім мен серіктестік орнады. Халық пен шаруа арасындағы байланыс тікелей орнап, өнім туралы ашық пікір алмасулар, кеңестер айтылды. Бұл – тұтынушы мен өндіруші арасындағы шынайы диалогтың алаңы. Ауылдан келген ағайындардың жүзінде шаршағандық емес, еңбектің ләззаты байқалды. Ал кент тұрғындары үшін бұл күн – табиғи өнімге қол жеткізудің сәті ғана емес, ауылдың шынайы дәмін сезінудің тамаша мүмкіндігі болды. Азық-түлік бағасының тұрақты б о л у ы – е л д і ң ә л е у м е т т і к тұрақтылығының бір негізі. Осы орайда Шиелі ауданында қолға алынған мұндай жәрмеңкелер – әкімдіктің халыққа деген қамқор көзқарасын, нақты істер арқылы көрініс тапқанын аңғартады. Бұл – құрғақ уәде емес, халықтың күнделікті тұрмысын жеңілдетуге бағытталған нақты қадам. Мұндай бастамалар – тек бір күндік шара емес. Олар ауыл шаруашылығын дамытуға, ішкі нарықты қолдауға, азық-түлік қауіпсіздігін қамтамасыз етуге бағытталған жүйелі жұмыстың бір бөлігі. Жәрмеңке соңында тұрғындар тарапынан айтылған жылы лебіздер мен алғыстар – бұл істің қаншалықты қажет әрі пайдалы екенін дәлелдеді. Жәрмеңке – халықтың өз өнімін өзіне ұсынудың ең ұтымды жолы екенін тағы бір мәрте көрсетті. Жер емген диқан мен маңдай терін мал баққан шаруа – елдің шын байлығы. Ал сол байлықты әділ жолмен халыққа жеткізу – бүгінгі биліктің, жергілікті әкімдіктің, елдік сананың жауапкершілігі. Шиелідегі сенбілік жәрмеңке – осы жауапкершіліктің сәтті көрінісі. Ел ырысы – жерден, ал береке – бірліктен басталады. Сол бірлік пен тірліктің тоғысқан тұсы – дәл осы жәрмеңке секілді шынайы шаралар. Сондықтан мұндай бастамалар жалғасын тауып, тек Шиеліде емес, барша қазақ даласында өріс алсын!

С.БАХТИЯРҚЫЗЫ