Бейсенбі күні Шиелі топырағы тағы бір тағылымды оқиғаның куәсі болды. Аудан прокуратурасының бастамасымен «Руханият» орталығында «Заң және тәртіп» қағидатына негізделген, мазмұны терең, маңызы зор кездесудің шымылдығы түрілді. Бұл жолы диалог алаңы – сан ұлттың өкілдері мен қоғамдық ұйым мүшелерін ортақ мүдде – бейбітшілік пен келісім үшін біріктірді.

Қоғамның іргесін шайқалтпай ұстап тұратын үш тірек бар: құқықтық сауаттылық, қоғамдық тәртіп және рухани тұтастық. Осы үш бағыт аталған басқосуда басты әңгіме арқауына айналды. Іс-шараға аудандық қоғамдық даму бөлімінің басшысы мен өкілдері, аудан аумағындағы этномәдени бірлестік мүшелері, белсенді жастар мен ардагерлер қатысты. Шара аясында құқық бұзушылықтың алдын алу, діни радикализм мен экстремизмнің алдын алу жолдары, жас ұрпақ тәрбиесі, ұлттық болмыс пен дәстүрдің сақталуы жөнінде келелі ойлар ортаға салынды. Әсіресе, жастардың құқықтық сауатын арттыру, оларға дұрыс бағыт-бағдар беру мәселесі кеңінен қозғалды. Кездесу ашық пікір алмасу, еркін диалог форматында өрбіді. Әрбір қатысушы өз ойын бүкпесіз білдіріп, көкейдегі сауалдарын қойды. Прокуратура өкілдері тарапынан нақты фактілерге сүйене отырып, заң аясында жан-жақты түсіндіру жұмыстары жүргізілді. Бұл – халық пен құқық қорғау органдары арасындағы сенім көпірін нығайтудың жарқын көрінісі.