Қыркүйек айы еліміз бойынша атаулы күндерге толы. Мәселен, осы айдың алғашқы аптасында көпшілік «Денсаулық күнін» атап өтті. Игі дәстүрге сай, бұл күні республикада бұқараны салауатты өмір салтын ұстануға, дене шынықтырумен тұрақты түрде айналысуға шақыратын түрлі шаралар ұйымдастырылады. Бұл мереке Шиеліде кең көлемде атап өтті.
Денсаулық фестивалінің мақсаты – медициналық көмектің сапасын арттыру және бұқараны спорттық шараларға көптеп тарту. Бүгінде бұл міндет барынша орындалып жатыр. Спорттық құрылымдар, секциялар, үйірмелер, фитнес-студиялардың есігі айқара ашық. Онда мықты жаттықтырушылар мен білікті мамандар риясыз қызмет етеді. Түрлі спорт түріне ынтықтар үшін жаттығу құрылғылары орнатылған. Бір сөзбен айтқанда, әркім іздегенін табады.

Осы фестиваль аясында «Денсаулық қалашығы» ұйымдастырылып, тұрғындар арнайы дәрігер мамандардан кеңес алды. Сондай-ақ кардиолог, невропатолог, лор, хирург, эндокринолог, гинеколог мамандары тұрғындарға тегін қызмет көрсетті. Ал тұрғындар флюоро, УЗИ, ЭКГ, глюкометр аппараты арқылы тегін диагностикалық тексерулерден өтті.