Еліміз тәуелсіздіктің бесігінде тербелгелі 31 жыл. 31 жыл ішінде Қазақстан етек-жеңін жиып, шекарасын бекітіп, өз алдына дербес зайырлы ел болды. Бұл атадан келе жатқан ұлы жеңістің жемісі. Оны ұрпақ санасына сіңіру, Тәуелсіздіктің ұлы ұғым екенін ұғындыру мақсатында №46 А.С.Пушкин атындағы мектеп-лицейінде «Елімнің бақытын тербеткен – Тәуелсіздік» атты іс-шара өтті.
«1991 жылы 16 желтоқсанда егемендігін алған еліміздің өз Президенті, ұлты мен ұлысы, салты мен дәстүрі, мәдениеті мен экономикасы болды. Желтоқсанның желі мен ызғарына қарсы тұрған жастардың жалынды рухы мен ерліктерінің арқасында шаңырағы биік, керегесі кең мемлекет болып қалыптастық» деп тарихқа шолу жасау арқылы шараның шымылдырығы түрілді. Тәуелсіздік мерекесіне орай тарих пәнінің мұғалімдері Гүлнар ­Абдукаликова, Сара Тулегенова, ­Лаура ­Батыршаева ұйымдастырған шараға 5 сынып оқушылары қатысты. Мектеп оқушылары алдымен Тәуелсіздік туралы толғауларын оқыды. Одан әрі күмбірлеген күй төгіліп, мың бұралған бишілердің «қазақ» биін тамашаладық. Тарих апталығын өткен жылдар шежіресімен байланыстыра отырып, көрерменге қуаныш сыйлаған шараның соңы оқушылардың сәлемдемесімен қарытындыланды.