Бала жаны жұмбақ әлем. Кішкентай сәбидің, естияр баланың саулығын білу үшін сезімталдық қасиет те керек. Ал, өмір үшін күреске толы мамандықты игеруге екінің бірі келмейтіні анық. Аталған салада 20 жылдан астам жұмыс жасап жүрген Айжан Бақытханқызының еңбегі көпке үлгі. Ол 1982 жылы Қызылорда облысы, Шиелі кентінде дүние дидарына келген. Мейірбеке болу бала кезгі арманы болған екен. Тіпті, ақ қалат киген абзал жандарға қызыға қарайтын оның осы мамандыққа деген шексіз сүйіспеншілігі оны осы мамандыққа жетелейді. Содан 1999 жылы Қызылорда медицина колледжіне «Акушерлік ісі» факультетіне оқуға түсіп, аталған оқу орнын 2002 жылы бітіріп шығады. Міне, осындай медицина саласының ауыртпалығын білген жас маман коледжді тәмамдаған соң 2003 жылдың 1 сәуірінде «Туберкулезге қарсы диспансер» бөлімінде кезекші мейіргерден бастаған ол 2004 жылы туберкулезге қарсы диспансерінде медстатис болып жұмыс істейді. Аталған диспансерде екі жыл қызмет жасаған ақ халатты абзал жан 2009 жылы жанұя жағдайына байланысты 3 К 169/4 мекемесінде медицина пунктінде мейіргер, 2017 жылы сәбилер үйінде мейіргер болса, 2020 жылдан бастап Шиелі ауданаралық ауруханасының балалар бөлімінде аға мейіргер болып жұмыс істеп келеді.
Кейіпкеріміз Айжан алдына келген бүлдіршіннің құлан таза айығып кеткенін көргеннен артық қуаныш бар деп ойламайды.
– Негізінен балалар арасында ең көп таралатын ауруларды жаз және қыс маусымы деп екіге бөліп қарастырамыз. Осы екі маусымда екі түрлі аурулар көбейеді. Қыс мезгілінде бізде тыныс жолдары, бронх-өкпе жолдарының ауруы көп кездеседі. Бұл аурулар түшкіру мен жөтелуден басталады. Оның арты қаралмағандықтан дене қызуы көтеріліп, соңы өкпе қабынуына айналып кетеді. Бұл қысқы уақытта ең қорқатын ауру. Ал жаз маусымында жедел ішек инфекциясы басталады. Балаларды білесіз ғой, аузына әр нәрсені салады. Дүниені енді танып келе жатқан бала жазғы уақытта көбейіп кететін жеміс-жидектерден бастап, тас, құмырсқаға дейін аузына салып көріп жатады. Соның бәрі ішек инфекциясына әкеліп соғады. Мұның алдын алу үшін ата-аналарына түсіндірме жұмыстарын жүргізіп, ем-дом жасаймыз. Көп жағдайда жас аналарға баланы қалай жуындырудан бастап, күтім жасауды, тамақтандыруды, бөлмені желдету қажетін де үйретуге тура келеді. Олардың тәжірибесі болмағандықтан балалары жиі ауырып жатады. Кішкентай бөбектеріміздің дені сау болса, ата-ана мен біз үшін мұның өзі үлкен бақыт дер едім, – дейді балар бөлімінің бас мейіргері Айжан.
Мерейі артқан мейірбикенің еңбегі еленіп, әр жылдары арнайы марапаттарға ие болған. Атап айтар болсақ, медицина саласындағы ұзақ жылдық сапалы еңбегі үшін 2004 жылы «Үздік мейіргер» номинациясымен марапатталған. Ол – кәсіби маманнан бөлек, отбасында адал жар, жанашыр ана бүгінде 1 ұл, 1 қыз тәрбиелеп отыр. Мемлекеттің басты байлығы – адам денсаулығы. Сәби десе құрақ ұшып, бар жүрегімен емдейтін бала мінезді Айжан Бақытханқызы сияқты ақ халатты абзал жандарымыз көп болса дейміз. Себебі, әрбір анаға баланың саулығынан асқан бақыт жоқ.
Ш.Тілеубаев